Embaixador Philip ho V-MI António Deskute Dezenvolvimentu PNTL

Naunil Media (Díli), Sesta (25/02) ne’e, Vise-Ministru Interior (V-MI), António Armindo enkontru ho Embaixador Nova Zelandia iha Timor-Leste, Philip Hewitt hodi koalia kona-bá haforsa kooperasaun no servisu apoiu dezenvolvimentu seguransa Polísia Nasionál Timor-Leste (PNTL).  

Hafoin enkontru, Embaixador Philip Hewitt, haktuir durante enkontru parte rua deskute, evalua kooperasaun servisu sira iha area seguransa dezenvolvimentu polísia nian mak antes ne’e halo ona atu kontinua iha futuru.  

“liu-liu programa Polisiamentu Komunitaria (Polkom) mak Nova-Zelandia atu apoiu komesa husi tinan 2022 too 2025. Diskusaun ida neé atu haree liu prioridade neébé mak importante iha Polisia Komunitaria”, informa diplomata ne’e ba jornalista sira, iha Ministériu Interior Vila-Verde.

Philip dehan, Guvernu Nova- Zelandia iha komitmentu bo’ot ba seitor seguransa iha Timor-Leste, hodi kontinua apoiu Polísia Komunitaria.

Iha fatin hanesan, Vise-Ministru Interior, António Armindo, agradese ba tulun ne’ebé durante ne’e, Timor-Leste hetan husi Nova Zelandia.

“Agradese ba Governu Nova-Zelandia liu husi Embaixador iha Timor-Leste, tanba esforsu nafatin hodi apoiu ita (Governu Timor-Leste) iha area segurasa nian”, tenik Governante ne’e.

Nia rekuiñese, durante tinan 20 nia laran Nova-Zelandia nafatin dezenvolve programa kooperasaun foka liu ba polisiamentu komunitaria.   

Semana kotuk, Nova-Zelandia mos asina ona akordu ona hodi fornese fundu ho Fundasaun Ázia (Sigla Ingles-TAF-The Asia Foundation). Objetivu atu kontinua servisu hamutuk ho PNTL hodi hadia setór seguransa iha Timor- Leste.

Alein de ne’e mos, sai instrumentu importante ba Komandante Munisípiu sira atu kontinua integra Polisiamentu Komunitária nu’udar medida preventiva hakbesik an ba komunidade sira nia leet. Ana