SEKOMS “Akara”: Povu Mak Sai Na’in ba Rádiu Komunidade

Naunil Media (Aileu),  Sekretáriu Estadu Komunikasaun Sosiál (SEKOMS sigla portugés) Merício Juvinal dos Reis “Akara” hateten, komunidade mak sai na’in ba radiu komunidade, liu liu ba rádiu komunidade Rai Husar.

“Rádiu komunidade importante hanesan meius komunikasaun ida ne’ebé besik liu ita nia komunidade no nain ba komunidade, maibé husu progresu sira tenke iha no nesesidade sira di’ak hodi responde”, dehan ),  Sekretáriu Estadu Komunikasaun Sosiál Merício Juvinal dos Reis “Akara” ba jornalista sira bainhira hala’o vizita koortezia ba Rádiu Komunidade Rai Husar iha munisípu Aileu, tersa (08/03).

Governate ne’e hatutan,  Governu apresia ezisténsia rádiu komunidade no iha inisiativa apoia nafatin, laos fó de’it insentivu maibé haree aspetu seluk hanesan, infraestrutura, ekipamentus, rekursu umanu no programa ka konteúdu ne’ebé iha.

“Akara” esklarese,  Rádiu komunidade presiza iha jestaun ida ne’ebé di’ak, tenke kontinua servisu tuir grella ka matadalan programa rádiu nian hanesan Talkshow, notísia, drama no publisidade sira.

Liga ba edifíu rádiu komunidade ne’ebe kiik,  Ezekutivu ne’e husu atu identifika nesesidades sira  bele tau iha planu,   hodi dezenvolve mós mídia iha munisípiu, tau orsamentu hodi bele harii edifísiu ida ba mídia munisípiu nune’e rádiu komunidade bele utiliza, dehan nia.

Governante ne’e apresia ba jestór no jornalista rádiu komunidade “Rai Husar” Aileu ho espiritu voluntarismu,  maibé nafatin servisu di’ak, no husu komunidade Aileu konsidera nafatin rádiu komunidade hanesan meius komunikasaun,  tanba komunidade mak na’in ba rádiu komunidade hodi responde prioridade iha interese hodi promove iha lian, kultura, produtu lokál, ekonómiku no sosiál.

Entertantu Diretór Nasionál Promosaun Dezenvolvimentu Mídia Lokál-DNPDML, José da Costa hateten, Fundus transferensia Públiku  FTP ne’ebé SEKOMS-DNPDML aloka ba Rádiu Komunidade sira bazea ba proposta nesesidade  rádiu nian.

Vizita ne’e alende SEKOMS, Partisipa hosi Administradór Munisípiu Aileu no akompaña mós hosi Diretór DNPDM. #Lop