Berta : “Hau Ho Governu Foun Sei Servisu Maka’as Ba Seitór Edukasaun”

Naunil Media (Aileu), Kadidatura Prezidente Repúblika (PR) periodu 2022 – 2027 ho nùmeru sorteiu (9), Armanda Berta dos Santos, deklara karik povu fó fiar sai xefe estadu, mak sei hamutuk ho Governu foun hodi servisu maka’as ba dezenvolvimentu seitór edukasaun iha Timor-Leste (TL).

“Hau sai Prezidente Repúblika (PR) la servisu mesak, maibé servisu hamutuk ho governu hodi tau orsamentu ba área edukasaun, liu husi buka no forma estratéjia oin-oin atu povu ninian oan hotu bele asesu ba edukasaun, tanba oihin loron labarik barak mak seidauk asesu eskola maske Estadu fó gratuita”, promesas kandidata PR, Armanda Berta dos Santos, liu husi kampana eleitoral, iha Kampu Futeból Munisípiu Aileu, Segunda (14/03).

Nia hateten, sei fó hanoin ba Governu foun atu tau osan ba edukasaun, infra-estrutura, no saúde atu povu hotu bele sente dezenvolvimentu.

“Sei servisu hamutuk ho parte hotu iha nasaun Timor-Leste  liu-liu fo hanoin ba governu hodi hare’e ba futuru joven nian inklui tau orsamentu ba inan-isin rua”, tenik nia

Berta, promote mos tau preoridade ba kombate problema má nutrisaun iha Timor-Leste.

“Se imi fó fiar eleita ba Prezidente, hau sei halo tuir komprimisiu ne’ebe define ona ”, hakotu nia. Ana