PM Taur: Husu Povu TL Kontribui Estabilidade iha ELPREZ
Naunil Media (Díli), Primeiru Ministru (PM), Taur Matan Ruak husu ba povu Timor-Leste kontinua koopera no kontribui ba estabilidade seguransa iha tempu eleisaun prezidensiál (ELPREZ) tinan 2022-2027.
Xefí Governu Taur Matan Ruak hato’o lia hirak ne’e ba jornalista sira hafoin enkontru semanal ho Prezidente Repúblika (PR), Francisco Guterres “Lú Olo” iha palásiu Prezidensiál Nicolau Lobato Bairru Pite, Kinta (17/03).
“Agora ha’u husu ba populasaun sira para ke kontinua nafatin koopera, sira labele haluha ha’u nia mensajen ne’ebé ha’u fó ba sira, bainhira ha’u vizita munisípiu sira, ne’ebé ha’u fó mensajen rua, ida kontribui ba estabilidade no seguransa, parake kampaña no eleisaun prezidensiál, ne’e bele la’o ho di’ak”, dehan Xefí Governu Taur.
Primeiru Ministru mós husu ba sidadaun sira atu hasa’e taxa partisipasaun, tanba bele ajuda reflete avaliasaun iha nasaun Demokrátiku ho nune’e partisipasaun di’ak bele fó previleju bo’ot nasaun.
“Segundu mak aumenta taxa partisipasaun ita nian tanba rua ne’e ajuda makas, no reflete iha avaliasaun dezempeñu Demokrátiku nasaun ida nian entaun, sé ita nia kontribuisaun di’ak partisipasaun di’ak ne’e fo previleju boot ba ita nia Nasaun”, katak PM Taur.
Taur hateten, Aumenta taxa partisipasaun no sidadaun hotu-hotu, ne’ebé bele halo esforsu para vota no hili kandidatu sira ne’ebé kandidata an ba Prezidente Repúblika periodu 2022-2027.
PM mós kontenti bainhira halo akompañamentu hanesan mós Ministru Interior halo akompaña ba kampaña tomak, embora iha insidente kiikoan-kiikoan mas forma jerál ne’e la’o di’ak hotu tanba ne’e nia kontenti. *Jos
