FEATUREDIkus LiuNewsPolitika

PM Taur: Tempu Sei Troka Tan Membru Governu VIII

Fahe Tutan

Naunil Media (Díli), Primeiru Ministru (PM) Taur Matan Ruak hateten iha tempu ruma sei halo tan substituisaun daruak ba membru VIII governu Konstitusionál, tanba desizaun iha Xefí Governu nia liman.

“Sei iha mas to’o tempu ita bo’ot sira sei hatene no ami sei fó hatene ba ita bo’ot sira”, dehan Xefí Governu Taur Matan Ruak ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite,  kinta  (24/03).

Taur hatutan, Iha opiniaun balun katak nu’udar xefí governu la brani halo substituisaun ba membru governu husi partidu FRETILIN no Partidu KHUNTO,  maibé Primeiru Ministru ne’e argumenta katak sé la brani karik uluk la ba halo funu.

“Ha’u labrani karik uluk ha’u la ba halo funu, ha’u hanoin ne’e ema seluk nia opiniaun, agora desizaun ne’e Primeiru Ministru mak hatene muda, se no tanba saida mak muda, tanba ne’e ita bo’ot sira hein de’it”, katak Taur Matan Ruak.

Antes ne’e membru Governu na’in-haat ne’e hetan ezonerasaun tuir proposta husi Primeiru Ministru, mak Prezidente Repúblika liuh usi Dekretu Prezidente Repúblika mós ezonera, Ministru Obras Púbilkas Salvador Eugénio Soares dos Reis Pires, Ministru Justisa Manuel Cárceres da Costa, Vise-Ministra Finansas Sara Lobo Brites, Sekretáriu Estadu ba Assuntus Kombatentes Libertasaun Nasionál Gil da Costa Monteiro ‘Oan Soru’.

Nune’e mós Membru Governu na’in-4 ne’ebé hetan nomeasaun husi Prezidente Repúblika, mak hanesan Ministru Obras Públikas, Abel Pires da Silva, Ministru Justisa, Tiago Amaral Sarmento, Vise-Ministru Finansas António Freitas, Sekretáriu Estadu ba Assuntus Kombatentes Libertasaun Nasionál Júlio da Conceição ‘Loro Messak’. *Jos

Leave a Reply

Your email address will not be published. Required fields are marked *