Ramos: PPN Aniceto Mak Sei Fó Posse Ba PR Eleitu
Naunil Media (Díli), Prezidente eleitu José Manuel Ramos Horta hateten, Prezidente Parlamentu Nasionál (PPN), Aniceto Longuinhos Guterres Lopes mak sei fó tomada de posse ba Prezidente eleitu tuir knaar ne’ebé iha.
“Serimónia posse sei prezididu husi Prezidente Parlamentu aktual, tinan rua mai ne’e nia mak dirije servicu iha aktividade Parlamentu nian, nia mak sei halo prezide serimónia tomada de posse tuir nia knaar,” dehan PR eleitu José Manuel Ramos Horta ba jornalista sira hafoin
enkontru ho aktual Prezidente Repúblika Francisco Guterres “Lú Olo” iha palásiu Prezidensiál Nicolau Lobato Bairru Pite, kuarta (27/04).
Ramos Horta hatutan tanba Prezidente Parlamentu Nasionál Aniceto Guterres mak iha tinan rua mai ne’e dirije trabalho Parlamentu nian, ho nune’e PPN sei kontinua ho traballo ba serimónia tomada de posse ne’e.
Horta esplika kona-ba xefe estadu sira husi nasaun seluk mai partisipa iha serimónia ne’e mak aktual Prezidente Repúblika Francisco Guterres “Lú Olo” mak fo konvite ba xefe estadu sira seluk tuir protokolu ne’ebé estabelesidu no nia pesoalmente haruka ona karta pesoal ba entidades lubuk ida no konfirma ona sira sei mai.
Nia dehan selebrasaun ne’ebé sei akontese iha dia 19 Maiu no 20 Maiu ne’e ho dignidade hanesan mensajen di’ak ida husi líder polítiku sira ba Juventude, sosiedade no ba mundu, purke iha mundu konflitu oioin konflitu funu entre estadu, Timor hanesan dame trankullidade iha Ázia no iha mundu, tanba laiha violensia polítika.*Jos
