Governu Aprova Proposta Lei Opsaun Prinsipál Planu Tinan 2023
Naunil Média (Díli), Konselhu Ministru aprova ona proposta lei Opsaun Prisipál Planu ba Tinan 2023, Kona-ba lei enkuadramentu legál Orsamentu Jerál Estadu (OJE), no Jestaun Finanseira Públika, ne’ebé aprezenta hosi Ministeriu Finanças (MF).
“ Ezisténsia Lei Opsaun Prinsipál sira Planu ne’e hanesan ezijénsia ida hosi lei Nú.2/2022, loron (10/02), ne’e lei enkuadramentu hosi Orsamentu Jerál Estadu no jestaun finanseira públika,”dehan Ministru Prezidénsia Konsellu Ministru, Fidelis Manuel Leite Magalhães, ba jornalista sira, hafoin reuniaun Konsellu Ministru Estraordináriu iha Palásiu Governu, segunda (09/05).
Fidelis hateten, Iha lei ida ne’e ho objetivu atu aprova opsaun anuál no plurianuál sira, kona-ba planeamentu ho impaktu iha OJE no programasaun orsamentál plurianuál nian ne’ebé sei permite konkretiza orsamentasaun tuir programa sira tomak.
“ Iha opsaun prinsipál sira planu nian (Grandes Opções do Plano) ba tinan 2023 nian ne’e aprezenta, tuir artigu da-47 hosi lei Nú. 2/2022, loron (10/02), identifikasaun estratéjia orsamentál no opsaun prinsipál sira kona-ba planeamentu ho impaktu iha OJE nian ba tinan orsamentál tuir mai no ba tinan ha’at tutuir malu.” katak nia.
Nia hatutan, Programasaun orsamentál plurianuál no analiza ba projesaun sira hosi indikadór prinsipál makro ekonómiku nian ho influénsia iha OJE ho nia evolusaun.
Enkunatu Proposta Lei ida-ne’e aprova ona iha KM, Nune’e sei submete ba Parlamentu Nasionál (PN).Ana
