Presija Kooperasaun MAE-Líder Komunitáriu Rezolve Lixu Iha Díli
Naunil Media (Díli), Membru Komisaun D Parlamentu Nasionál (PN), Deputadu Domingos Carvalho de Araújo, hateten atu resolve problema lixu iha kapital Díli, presija kooperasaun servisu entre Ministériu Administrasaun Estatál (MAE) ho líder komunitáriu hanesan, xefe aldeia no xefe suku.
“Maske udan para ona kuaze semana rua, tolu, maibe lixu kontinua namkari iha kapital Díli, tanba Ministériu no Diresaun ne’ebé tutela abandona de’it lixu. Husu ba Minitru Administrasaun Estatal, Miguel Pereira de Carvalho, atu rezolve problema lixu”, Deputadu Domingos Carvalho de Araújo, ba jornalista sira hafoin debate orsamentu ratifikativu final global iha PN, Kuarta (11/05).
Tuir reprezentante povu iha uma fukun PN, Domingos Carvalho de Araújo, lolos inundasaun akontese mak lixu namkari, tamba lixu husi foho mak tun mai iha sidade laran, udan para tiha udan para tiha mos lixu sei nafatin abandona.
“Quer dizer, la iha kapasidade atu bele organiza ita nia ema rasik hodi halo limpeza iha sidade laran, liu-liu lider komunitáriu sira tenki tau matan mos ba foer sira ne’ebe iha idak-idak nia bairu”, tenik nia.
Deputadu bankada CNRT ne’e dehan, kada tinan Governu aprova orsamentu ba MAE, atu haree mos ba problema lixu maibe nunka resolve.
“Osan agora tau ne’e bo’ot, maibe lahatene atu halo saida, inundasaun sira agora iha kapa okos mos agora seidauk rezolve, projetu sira mos la selu, valeta sira mos nakonu ho rai henek, jardim sira mos dut naruk no foer sira mos komesa abandona ona sidade”, dehan nia.
Ikus-nia relata, “Tinan ida de’it osan bele to’o 4 milões, tuir lolos ne’e 1.4/1.5 milões maibe laiha rezultadu ida, maibe sira haree liu ba nesesidade partidu nian”. Mj1
