SEJD-FH Lansa Manual Internet Saudavel

Naunil Media (Díli), Dirétor Nasional Kriatividade Joventude (DNKJ), Cesarinho Da Silva imforma,  Sekrétariu Estadu Joventude no Desportu (SEJD) hamutuk ho Fundasaun Hadomi (FH) realiza Workshop hodi Lansa Manual Internet Saudavel no Video Utilizasaun Saudavel ba Joven no Estudante Ho Idade 15 -24.

“Objetivu husi atividade ne’e, mak atu sensibiliza informasaun joven sira. Liu-liu estudante sira ho idade 15 to’o 24 atu oinsa utiliza media sosial, liu-liu internet uza ho saudavel no responsavel signifika ita nia joven no estudante sira utiliza ba interese no peskiza referensia sira no bele hetan esperiensia foun sira seluk liu-husi tutorial youtube, atu evita joven no estudante sira fahe informasaun Hoax ou Falsu, inklui labele lansa defamasaun ba ita nia maluk sira iha mídia sosial”.  Dirétor Nasional Kriatividade Joventude (DNKJ), Cesarinho Da Silva, dehan iha Salaun Magna SEJD Bidau-Lesidere, Kinta (12/05).

Nia haktuir, tuir planu formasaun hala’o durasaun semana rua (2), hahu iha loron Segunda loron 16 Maiu iha Munisipiu Lautem, inklui Munisipiu hotu no Rejiaun Automo Espesial Oecusse Ambeno (RAEOA).

Enkuantu Tarjetu partisipasaun Joven no Estudante kada Munisípiu hamutuk na’in-66. Hahu lansamentu to’o formasaun ne’e remata preve osan montante Dollar Amerikanu rihun $13.769 .

“Ohin Loron ita labele bandu Joven no Estudante sira atu uza internet nomos taka situs sira ne’e laos dalan tamba agora ema matenek barak. Espera liuhusi Programa ne’e, bele konsensializa ita nia Joven no Estudante sira atu uza internet ne’e ho di’ak”, nia relata.

Entretantu, Sekretariu Estadu Joventude no Desportu (SEJD) Abrão Saldanha, hatete, lansamentu ne’e atu tulun ita nia Joven no Estudante sira, oinsa atu utiliza internet ne’e ho saudavel no responsavel ba sira nia moris.

Desde deskobrementu Internet no Teknolojia ba Transporte Komunikasaun nian iha Sekulu-XVIII (Abad ke-18) halo mundu sei mudansa no kloot, tanba akontesementu iha fatin ne’ebe de’it liu-husi internet ita bele hatene, no ita bele aprende saida de’it bele halo Tranzaksaun, Komunikasaun no fa’an sasan ruma bele liu-husi internet sira, vida ohin loron ne’e maioria ho internet, nia haktuir.

“Prejensa internet nia inportante tebes, tanbá bele fasilita ita halo explora ita nia potensial no fahe informasaun ba públiku, maibé internet rasik hamosu risku oioin hanesan Cyber Crime no situs sira ne’ebé ema ba asesu pornografia, Tranzaksaun ilegal no Lansa informasaun falsu ka Hoax”, nia informa.

Nune’e, SEJD hakarak tulun Joven no Estudante sira liu-husi formasaun ruma atu uza internet ho saudavel no responsavel atu explora sira nia abilidade no potensial aprende iha mundu virtual ka online hodi promove komunidade sira liu-liu ita nia rai doben Timor-Leste.

Ho ida ne’e, Prezidenti Fundasaun Hadomi, Abrão Monteiro, Hatete, Fundasaun Hadomi servisu hamutuk ho SEJD kleur ona no antes ne’e servisu hamutuk ona iha area informasaun nian.

“Ohin Fundasaun Hadomi hetan Previlejiu boot ida tanba bele servisu hamutuk ho SEJD atu fó formasaun hodi konsensializa ita nia Joven no Estudante atu uza internet ho di’ak tuir regras hodi evita ameasa sira iha mídia Sosiál, tanbá ne’e, hanesan ita hotu hatene katak, iha mídia Sosiál ne’e, impaktu barak depende ba ita nia utilizasaun di’ak bele hetan benefisiu entermus referensia, informasaun, Edukasaun, Negosiu nian no vida polítiku nian. Karik ita uza ba ladiak mak sei fó afeta ita nia an, Familia, Komunidade no nasaun rasik,” nia informa.

Formasaun ne’e, pendente tebes ba ita nia Joven sira atu preparadu hodi hasoru Teknolojia, tanba ita labele hakiduk ona, maibé presija avanza ba oin hodi hasoru Teknolojia ohin loron.

Tarjetu ne’e, pendente tebes ba joven ho idade 15 to’o 24 atu aprende no iha kapasidade, abilidade ne’ebe di’ak atu utiliza internet ba ita tempu servisu ka fatin ne’ebé de’it atu kontribui mós estabilidade iha nasaun laran,  nia hakotu. LTS