Dala Ikus Lú Olo Kondekora Sobreviventes 66, Saudozu 17
Naunil Media (Díli), Ba dala ikus liu Prezidente Repúblika (PR), Francisco Guterres Lú Olo Kondekora Sobreviventes hamutuk nain neen nulu resin neen (66) no saudozu hamutuk nain sanulu resin hitu.
PR Lú Olo hatutan ho onra no orgullu boot mak kondekora ba dala ikus liu, ho naran Estadu Timor-Leste, veteranus luta libertasaun nasional, ne’ebé reziste entre tinan sanulu resin lima no tinan sanulu resin sia, liuhusi dalan oioin no ho ida-idak nia kbiit rasik, hodi tanen mehi boot atu afirma-an iha mundu, nu’udar nasaun no povu ida ho identidade rasik.
“Hamutuk hotu sobreviventes neen nulu resin neen no saudozu sanulu resin hitu mak simu rekoñesimentu no valorizasaun nu’udar eróis no eroínas nasionais, iha loron ohin, 16 maiu 2022, iha Palásiu ida ne’ebé fó honra permanente ba ita-nia líder polítiku, mártir no erói nasionál, Prezidente Nicolau dos Reis Lobato,” dehan Xefe estadu Francisco Guterres Lú Olo liu husi diskursu, iha palásiu Prezidensiál Nicolau Lobato Bairru Pite, Segunda, (16/05).
PR hateten ho kondekorasaun ne’e kombatentes libertasaun nasional Luta Armada – Frente Interna, rejistadu no validadu, ne’ebé tuir lei, klasifika nu’udar veteranus, simu hotu ona rekoñesimentu no valorizasaun husi estadu Timor-Leste.
Lú Olo esplika di’ak tebes bainhira Estadu organiza atu solene ida hodi rekoñese no valoriza kombatente libertasaun nasional liuhusi kondekorasaun OTL, grau Colar, maibé estadu fó mós protesaun ba sira nia dependente sira, oan kiak no faluk sira.
Xefe estadu akresenta rekoñesimentu no valorizasaun ba luta-nain sira konsagra iha Lei Inan nune’e, estadu hatene ninia obrigasaun husi kedas loron restaura indepedénsia nasionál, iha 20 maiu 2002, no mós iha artigu 11 Konstituisaun RDTL hatete katak estadu asegura protesaun espesiál ba mutilados de guerra, órfauns no dependente sira husi luta-nain sira ne’ebé fó sira-nia vida ba luta independénsia no soberania nasional no proteje hotu-hotu ne’ebé partisipa iha rezisténsia.
Nia dehan to’o ohin loron estadu nia apoiu ba Kombatentes Libertasaun Nasionál konkretiza liuhusi subvensaun públika ne’ebé fulan-fulan fahe ba kombatentes libertasaun nasional sobreviventes no famílias mártires sira- nian tuir validasaun ba ida-idak ninia partisipasaun iha luta libertasaun nasional.*Jos
