ACCCTO-MEJD Asina Akordu Dezenvolvimentu Seitor Edukasaun TL
Naunil Media (Díli), Asosiasaun Komersiál Komunidade Xineza Timor Oan (ACCCTO-Sigla Português), servisu hamutuk ho Ministeriu Edukasaun Joventude no Desportu (MEJD) asina akordu iha seitor edukasaun.
Embaixador Repúblika Popular Xina, Xião Jianguo iha Timor-Leste, senti kontente tanba hola parte iha eventu asina akordu refere no konsidera importante Timor-Leste, liu-liu ba dezenvolvimentu iha area edukasaun.
“Embaixador Xineza apoiu tebes ba komunidade asosiasaun nian, bele loke eskola Xineza nian no seluk tan ne’ebé bele fo kontribuisaun ba dezenvolvimentu Timor”, hateten Embaixador Repúblika Popular Xina, Xião Jianguo, liu husi nia deskursu iha Suai Room Timor Plaza, Kuarta (18/5).
Diplomata husi Repúblika Popular Xina, Xião Jianguo, ne’e dehan joven sira iha Timor-Leste mós barak mak iha ona hanoin hakarak kuiñese di’ak liu tan ho nasaun Xina
Iha sorin seluk, Prezidente ACCCTO, Kathleen Gonsalves Fon Ha Tehong, haktuir “ohin asina akordu ho MEJD kona-ba eskola Sub Filial Bázika Nu’u Laran hanesan antigu eskola Xina Díli.
“Objetivu, liu husi kooperasaun no servisu hamutuk ho MEJD hodi dezenvolve no transforma eskola refere sai eskola referensia ida hanesan eskola públiku ho ninia jestaun privada”, esplika Prezidente ACCCTO, Kathleen Gonsalves Fon Ha Tehong.
“Iha ami nia jestaun ami sei asegura iha ensinu kualidade ho preofesores kualifikadu no esperientes no ami mós iha planu sei rehabilta infrastrutura ne’ebé iha no sei aumenta tan mós infrastrutura hanesan sala de aula foun, sala ba preofesores, Administrasaun, sala ensinu tekniku vokasional, no hari mós biblioteka no seluk tan”, informa nia
Ministru Edukasaun Juventude no Desportu, Armindu Maia, hateten, hafoin simu mandatu hanesan Ministru Edukasaun, nia simu reprezentante husi ACCCTO hodi ko’alia konaba projetu dezenvolve fila-fali eskola Xina iha Timor-Leste.
“Diskusaun la’o iha tempu naruk as vezes senti hanesan atu la’o ba oin la la’o ka marka pasu, maibé depois tinan ida ho balun ita konsege duni, ne’e tanba vontade polítika husi parte rua nian”, rekuiñese Ministru ne’e.
Ikus nia dehan, “Nune’e mak ohin ita hotu bele asina akordu atu kesi ita parte rua hakat ba oin”. LTS
