Governu Índia Apoia Foos Tonelada Rihun 2 Ba TL

Naunil Media (Liquiça), Governu Timor-Leste liu husi Sekretaria Estadu Protesaun Sivíl hetan apoiu husi Ppovu no Governo Índia ofisialmente entrega foos toneladas 2,000 (40,000 sakas).

“Foos ne’e Protesaun Sivíl mak sel kontrola, renponsabiliza no halo jestaun hodi distribui ba armajen protesaun sivíl munisipiu sira inkuli RAEOA hodí fó apoiu ba vitima dezastre natural iha territóriu nasional”, hateten Sekretaria Estadu Protesaun Sivíl, Joaquim Gusmão, ba jornalista sira hafoin Serimonia Entrega fos iha Armazen CLN Tibar, Munisipiu Liquiça, Kuarta (18/05).

Governante ne’e haktuir, apoiu refere nu’udar resposta husi husi Pedidu mne’ebé Sekretariu Estadu Protesaun Sivíl hato’o ba ba Governu Índia liu husi nia Embaxada hodi husu Tulun Aihan hodi apoiu vítima sira.

“Agradese tebes ba Governu Índia liu husi Embaxada ba Timor-Leste, ne’ebe bele ona apoiu foos mai ita liu-liu atu fahe ba vítima dezastre natural iha tinan kotuk”, tenik Membru Governu konstitusional da-ualu ne’e.

Nia informa, dadaun ne’e iha toneladas atus lima (500) mak iha ona kontentor ualu nulu resin hitu (87) atraka ona iha Portu Díli enkuantu restu sei iha hela dalan.

“Ita sei stok fila fali ba Munisípiu sira, tantu Munisípiu 14 no RAEOA nune’e wainhira akontese dezastre ruma ita bele apoiu lalais”, katak Joaquim Gusmão.

Iha fatin hanesan, Embaxador Índia ba Indonésia no Timor Leste, Manoj Kumar Bharti, informa Governo Índia nafatin apoiu Timor-Leste iha kualker situasaun wainhira husu tulun.

“Ami prontu apoiu Timor iha situasaun saida deit, wainhira ita bo’ot sira husu Tulun”, afirma Diplomata Indiano ne’e.

Nia hatutan, Governo Índia sei la taka dalan ba Timor-Leste, sei kontinua hametin kooperasaun diak entre nasaun rua nian.

“Governu India kompromete sei apoiu Timor-Leste ba dezenvolvementu kapital humanu, saúde infraestrutura no prontu kapasita Timor oan sira”, dehan nia. Ana