PR Lú Olo Promulga Ona Dekretu-Lei Subsidiu Ba Uma-Kain
Naunil Média (Dili), Prezidente Republika (PR), Francisco Guterres “Lú Olo” horseik, 18 Maiu 2022, promulga Dekretu-Lei subsídiu iha tinan nia rohan ba uma kain ho montante fiksu US $ 200.
Liu husi Komunikadu ne’ebé Naunil Média asesu iha palásiu Prezidensiál Nicolau Lobato Bairru Pite, Kinta, (19/05), ne’e esplika katak subsídiu ba uma-kain iha tinan nia rohan ho objetivu atu apoiu ekonomia ba famílias ne’ebé vulneravel liu hodi hetan benefísiu osan ba selebrasaun festa iha tinan nia rohan.
Anualmente iha tinan nia nia rohan Governu aprova halo pagamentu estraordinariu ho salariu adisionál ba funsionáriu no ajente Administrasaun Públika no traballadores nacionais sira seluk.
Maibe halo pagamentu husi parte Estadu ba traballadores husi instituisoins públikas kria desigualdade no injustisa sosiál ba sidadaun sira seluk, espesialmente ba sira ne’ebé la hetan rendimentu mensál regular ka laiha serbisu, tanba sira ne’e mak tenke hetan benefísiu sosiál husi estadu.
Benefisíariu sira husi subsídiu iha tinan nia rohan mak uma kain sira ne’ebé rejistadu iha “Livru Rejistu Uma Kain” iha suku sira iha territoriu nasionál tuir Diploma Ministerial numeru 49/2017, 23 agostu, no prezente hela iha territoriu nasionál bainhira halo pagamentu.
Uma Kain sira ne’ebé sei hetan subsídiu ne’e mak uma kain ho rejistu efetuadu too 28 fevereiru 2022, bainhira auzente iha tempu halo pagamentu tenke aprezenta justifikasaun ne’ebé bele simu.*Jos
