PR Portugal Marcelo Rebelo To’o Timor Partisipa Pose PR Eleitu José Ramos Horta
Naunil Media (Díli), Prezidente República Portugal, Marcelo Rebelo de Sousa akompana husi Ministru Estranjeiru Portugal João Gomes Gravino no komitiva to’o ona iha Aeroportu Internasional Nicolau Lobato Komoro, Díli.
Xefe Estadu Portugal, Marcelo Rebelo de Sousa, ho komitiva to’o mai iha tuku 7:30 htl (Kuarta 19/05) ho avaiun EutoAtlantic.
Prezensa dahuluk Xefi Estadu Portugal ne’e, iha Timor Leste, hodi partisipa iha Serimónia Investidura Tomada de posse ba Prezidente Repúblika Demokratika Timor-Leste (RDTL) foun José Manuel Ramos Horta ba periodu 2022-2027 ne’ebe sei hala’o iha loron 19 fulan Maiu ne’e iha Tasi Tolu, Díli.
Prezidente Repúblika Portugal ne’e mós sei partisipa iha Aniversáriu loron restaurasaun Independensia Timor-Leste ba dala rua nulu iha loron 20 fulan Maiu ne’e, ne’ebe sei festeza iha Palasiu Prezidensial Aitarak Laran, Díli.
Durante estadia iha Timor-Leste Xefi Estadu Portugal ne’e sei hasoru malu mos ho aktual Primeiru Ministru, Taur Matan Ruak no Prezidente Repúblika sesante Francisco Guterres ‘Lú Olo’.
Ema númeru um husi Portugal ne’e mos sei vizita Universidade Nasionál Timor Lorosa’e (UNTL), eskola Portuguêsa Ruy Cinati Balide, Sentru Aprendizajem Formasaun Eskolar (Sigla Português-KAFE), vizita muzeum rejistensia no sei hala’o inagurasaun ba edifisiu foun Embaxada Portugal iha Timor-Leste.
Tuir observasaun jornalista www.naunil.com, Xefe Estadu Portugal ne’e to’o iha Aeroporto Internasional Nicolau Lobato, simu direita husi Vise Primeiru Ministru, José Maria Dos Réis no akompaña ho dansa Kultura Tebedai hafoin kontinua ho parada militar hodi la’o tama ba sala VIP, molok kontinua ba fatin deskansa ne’ebe Estadu Timor-Leste prepara ona iha Hotel Timor. Ana
