Australia Fasilita Formasaun Ezaminasaun Dokumentus ba Ofisiais Migrasaun
Naunil Media (Díli), Governu Australia, liu hosi nia embaixada iha Díli fasilita formasaun kona-ba ezaminasaun dokumentus ba ofisial no ajente hosi Diresaun Jeral Servisu Migrasaun (DGSM) hamutuk nain 20 hodi haforsa jestaun fronteira ida ne’ebé di’ak iha postu fronterisa territóriu nasionál tomak.
Adjunta Diretora Jeral Servisu Migrasaun, Inspetora Xefi Polísia Adelaide da Rosa, hateten objetivu hosi formasaun ne’e atu kapasita ajente no ofisial Migrasaun sira oinsa halo ezaminasaun ba dokumentu.
“Kursu ida ne’e realiza liu husi kooperasaun servisu entre Diresaun Jeral Servisu Migrasaun ho Adidu Migrasaun Australia liu hosi Embaixada Australia iha Díli ho objetivu atu hasa’e ita nia membru sivil no PNTL sira nia kapasidade hodi deteta dokumentus falsifikadu no fraude nian mak hanesan pasaporte, kartaun identidade no-mos osan falsu sira ne’e”, dehan Adelaide, iha nia knar fatin Ministeriu Interior,Vila-Verde, Tersa (24/05).
Nia informa, ofisial Migrasaun sira ne’ebe partisipa iha formasaun ne’e mai hosi sede sentral, Postu Fronteiras Regional Baucau no-mos Reziaun Administrativu Espesiál Oe-Cusse – Ambeno (RAEOA).
“Ida ne’e mos hanesan faze ida hodi halo kontrolu ba dokumentus, liu-liu minimiza dokumentus falsu tama iha iha ita nia nasaun liu-liu haforsa seguransa iha fronteira liuhosi monitorizasaun no kontrola krime organizadu sira”, tenik nia.
Nia hatutan, “Kursu refere realiza iha Sentro Formação Polísia Komoro, sei hala’o durante loron tolu nia laran hahu hosi 24 to’o 26 maiu 2022, no instrutur no peritus nain 2 mai hosi Departamentu Home Affairs – Australia”. Ana
