Governu TL-Kompañia ASN Asina Kontratu Akizisaun no Instalasaun Kabu Submarinu Fibra Óptika

Naunil Media (Díli), Iha Palasiu Governu,Tersa (32/05) ne’e, Timor-Leste (TL) liu husi Governu konstitusional da-ualu, komisaun interministeriál ba implementasaun sistema kabu submarinu fibra óptika, kompostu hosi Vice-Primeiru-Ministru no Ministru Plano no Ordenamentu, nudár Prezidente, Ministru Koordenadór ba Asuntu Ekonómikus, Ministru Finansas, MinistruTransportes no Telekomunikasaun, no kompañia Alcatel Submarine Networks (ASN), halo asinatura ba Kontratu Akizisaun no Instalasaun Kabu Submarinu Fibra Óptika.

Iha intervensaun Primeiru-Ministru, Taur Matan Ruak, fó apresiasaun ba servisu ne’ebé Komisaun Interministeriál, ne’ebé lidera husi Vise-Primeiru-Ministru e Ministru do Plano e Ordenamentu, hala’o, nune’e mós apresia servisu husi Grupu tékniku. Liu husi sira nia kolen mak Timor-Leste hakat tan pasu ida iha projetu estratéjiku ida, asinatura ba Kontratu Akizisaun no Instalasaun husi ligasaun dijitál Timor-Leste nian, liu hosi kabu submarinu fibra óptika, ba Sidade Darwin no Port Hedland iha Commonwealth da Austrália, atu bele kumpre objetivu ida ne’ebé estabelese iha Programa VIII Governu.   

Iha diskursu, Xefe orgaun ezekutivu, Matan Ruak, hatete garantia ba timor-oan hotu asesu internet la’ós kestaun asesibilidade ba ema hotu, iha territóriu laran tomak, maibé relasiona mós ho asesu internet ho folin asesivel ba ema hotu.

“Infraestrutura ida ne’e sei loke dalan ba timor-oan hotu, independentemente ba nia kbiit atu iha asesu ba internet. Ida ne’e mós hanesan pasu importante ida ba diversifikasaun ekonómika no hamenus dependénsia ba setor Petrolíferu,” tenik Primeiru Ministru, Matan Ruak.  

Iha serimónia ida ne’e Vise-PM no Ministru Plano no Ordenamentu, José Maria dos Reis, hatete VIII Governu konstitusional mós marka tan pasu ida ba iha reforma sira ne’ebé Governu halo hela daudaun iha setor teknolojia no informasaun, hodi aproxima Timor-Leste iha Era Dijitál.

“Manifesta haksolok tamba projetu ida ne’e finansia 100% hosi orsamentu Governu Timor-Leste. Governu anunsia mós katak, projetu ida ne’e sei la termina ho instalasaun Kabu Submarinu Fibra Óptika, maibé fó posibilidade atu halo ligasaun foun no afirma katak sei estabelese Empreza Públika, ida ne’ebé sei halo jestaun, operasionalizasaun no manutensaun ba investimentu boot ida ne’e”, akresenta V-PM, José Reis.

Serimónia asinatura akordu refere hetan partisipasaun espesiál husi Primeiru-Ministru, Taur Matan Ruak, Ministru Finansas Dr. Rui Gomes, Ministru das Obras Públikas, Abel Pires, Ministru Transporte no Telekomunikasaun, Agostinho da Silva, Ministru da Justisa, Tiago Amaral Sarmento, Embaixadór Australia iha Timor Leste, Bill Costello, no inklui grupu tékniku interministeriál. Mj3