Cidalia: Asembleia Jerál Rede Feto Importante Hodi Hametin Organizasaun

Naunil Media (Díli), Embaixadora Plan Internasionál Timor-Leste (PITL), Cidália Lopes Nobre Mouzinho Guterres hateten asembleia jerál rede feto nu’udar prosesu importante hodi hametin liu tan organizasaun institusionalmente.

“Ondra mai ha’u simu konvite ida ne’e husi rede feto atu hola parte iha asembleia ne’ebé mak realiza kada tinan, tanba ha’u fiar katak asembleia jerál nu’udar prosesu importante ida hodi hametin liu tan Organizasaun institusionalmente”,  dehan Espoza Eis Prezidente Repúblika Cidália Lopes Nobre Mouzinho Guterres liu husi diskursu iha Salaun Delta Nova, kinta, (02/06).

Embaixadora ne’e hatutan,  Iha asembleia ne’e mós sei relata atividades ne’ebé mak rede feto halo, iha tinan ida nia laran inklui dezafiu no lisaun, aprendisazen hodi bele halo di’ak liu tan servisu rede feto ninian.

Cidália hateten,  Durante nia akompaña situasaun tinan hira ba kotuk, ne’ebé rede feto hasoru,  maibé ho grasa Maromak nian iha ona desizaun ne’ebé mak fó sai ona.

“Iha asembleia ida ne’e mós hanesan ohin Prezidente rede feto hato’o ona katak sei hato’o kona-ba situasaun saida mak hala’o tiha ona, durante ne’e ha’u mós akompaña tinan hira ba kotuk situasaun ne’ebé mak rede feto hasoru,  gracas a deus iha ona desizaun ne’ebé mak fó sai ona”,  tenik Cidália

Embaixadora PITL ne’e mós deseza servisu sira ne’e hotu sei barak mak presiza sei halo, tanba tema sentrál ne’ebé mak hateten katak hamutuk hametin igualidade ne’ebé inkluzivu no sustentavel,  ne’ebé hanoin feto hotu-hotu tenke lolo liman hamutuk para hodi sa situasaun de’it mak feto hasoru. Dala barak ita hanoin katak kiik oan ida maibé iha dalan halo dialogu tur hamutuk hodi ko’alia ba malu hodi foti desizaun, problema boot liu ne’ebé ita hasoru ha’u hanoin importante liu ita hamutuk para hateke ba oin ida ne’e mak ita nia mehi iha future, hakotu nia.*Jos