Janeiru-Abril 2022, FOKUPERS Rejista Kazu Violensia Domestika 18
Naunil Media (Díli), Diretora FOKUPERS, Maria Fátima Perreira Guterres, informa hahú husi fulan Janeiru to’o Abril tinan 2022, sira rejista númeru kazu violensia hamutuk 49 no husi númeru ne’e violensia domestika 18.
“Vítima hirak ne’e kompostu husi krime, viólensia domestika/maustratus 18, viólensia domestika ba labarik iha 2, abandona husi laen 17, viólensia sexual ba ema bo’ot 3, viólensia sexual ba labarik 4, insestu ba labarik 2, asedu sexual 1, viólensia públik/la’os VD agresaun fíziku ba bo’ot 2”, Maria Fátima Perreira Guterres, ba www.naunil.com iha nia knar fatin, Farol, Segunda (06/6).
Diretora hateten, FOKUPERS kontinua sira-nia servisu pilar prevensaun ba vítima sira maka presija tulun, atu akompaña no tuir dalan legal.
“Iha uma mahon, ami fornese informasaun oi-oin, halo atividade hodi aumenta sira-nia abilidade moris ninia, bainhira sira fila-fali ba uma karik, bele halo netik buat ruma, hanesan halo dosi, suku no seluk tan”, tenik nia.
Nia hatutan, FOKUPESR nia atendementu ne’e ba iha kazu ne’ebé maka relasiona ho viólensia bazeia ba géneru nian, maibé iha kazu balun ne’ebé maka konsidera hanesan kazu sivil.
“Ezemplu, krime maka viólensia domestika, abuzu sexual, iha fali mós kazu sivil maka hanesan kazu abandona, ne’e konsidera kazu sivil ninia prosesu mós tuir prosesu sivil”, esplika nia.
Ikus, nia dehan, sira iha uma mahon 3 nomós uma tranzitu ida iha Suai, iha Dili iha uma mahon 2, uma mahon ba ema bo’ot nomós ba Labarik, iha mós uma ida Munisipiu Maliana, maibé nia atendementu la’os fokus de’it ba Munisipiu haat ne’ebé iha, maibé mós hetan referal husi Munisipiu sira seluk, tan ne’e maka sira-nia atendementu ba vítima sira hosi Munisipiu seluk mós. Rit
