Labarik  TL Hamutuk 52.000 Nu’udar Traballu Infantil, Lakon Sira Nia Edukasaun

Naunil Media (Díli), Tuir peskiza labarik hamutuk 52.000 mak konsidera servisu ne’ebé aat hodi prezudika sira nia edukasaun, fiziku no intelektual, tanba ne’e Timor-Leste (TL) presiza asaun imediatu kontra traballu infantil.

Lia hirak ne’e hato’o husi Prezidente Komisaun Nasionál Kontra Traballu Infantil (KNKTI), Aniceto Leto Soro ba jornalista sira hafoin enkontru ho Prezidente Repúblika (PR), José Manuel Ramos Horta iha Palásiu Prezidensiál Nicolau Lobato Bairru-Pite, segunda, (06/06).

“Eziste traballo infantil iha Timor-Leste purvolta de 52.000 Mil ne’ebé konsidera serviSu ne’ebé aat, ne’ebé prezudika ba sira nia edukasaun sira nia dezenvolvimentu fiziku no intelektual, ne’ebé ita presiza tau asaun imediatu iha ita nia planu asaun nasionál ba kontra traballu infantil hodi nune’e bele elemina ou solusaun alternativa saida mak ita bele fó liuliu servisu,  hamutuk ho liña Ministerial ne’ebé mak kompetentes iha área de crianças”, dehan Prezidente KNKTI.

Prezidente Organizasaun ne’e haktuir,  Sira aprezenta mós ba Prezidente Repúblika rezultadu servisu ne’ebé sira halo, hanesan sira halo peskiza nasionál kualitativu no kuantitativu ne’ebé sira halo tiha ona iha 2016 no mós iha 2022.

“Ha’u hanoin ita nian, ohin ami aprezenta ona, Munisípiu ne’ebé mak barak liu mak iha Aileu, Ainaro, Ermera, Oe-Cussi, Suai mós ne’e mak maioria labarik sira halo servisu, no idade minor ne’ebé mak ami halo peskiza sira ne’ebé halo servisu 5 too 17 anus,” katak Prezidente Organizasaun

Aniceto hateten, Sira mós aprezenta ona lista aktividade perigozus ne’ebé proividus ba traballo infantil, no lista ne’e iha ona gabinete MCAE nian, no sira haree katak presiza mós apoiu ida ne’e atu bele aselera para bele ajuda proteze labarik sira, liuliu idade minor ne’ebé mak halo servisu.

Nia dehan,  Sira mós aprezenta ona ba MCAE planu nasionál kontra traballo infantil ne’ebé planu ne’e ho durasaun tinan lima (5), no Prezidente Repúblika mós iha vontade atu ko’alia ho Primeiru Ministru para bele avansa prosesu ida ne’e.

Iha enkontru ne’e Prezidente Repúblika mós aprezenta vizaun di’ak, ba sira no aprezenta mós esperiénsia balun ne’ebé mak ko’alia liu-liu termus traballu infantil ne’ebé balun mak presiza iha ideias ne’ebé mak di’ak, tuir realidade Timor nian no PR mós sei aprezenta ba iha Primeiru Ministru. *Jos