Embaixador Filipina Hakarak TL Adere Lalais Ba ASEAN
Naunil MEdia (Díli), Embaixador Filipina Abdul Maid Kiram Muin hateten, Filipina hakarak Timor-Leste (TL), adere lalais ba iha Association of Southeast Asian Nations (ASEAN), no sira sempre suporta tanba Timor-Leste ho Filipina iha relasaun di’ak.
Lia hirak ne’e hato’o husi Diplomata Filipina ne’e ba jornalista sira hafoin enkontru ho Prezidente Repúblika (PR) José Manuel Ramos Horta iha Palásiu Prezidensiál Nicolau Lobato Bairru-Pite, Tersa (07/06).
“Ohin ami la ko’alia kona-ba adezaun Timor-Leste tama iha Asean, maibé ohin ami ko’alia de’it kona-bá situasaun ne’ebé iha Timor-Leste, maibé ha’u mós hakarak Timor-Leste bele adere lalais ba iha Asean nian, ami Filipina sempre suporta tanba iha relasaun di’ak tebes ho Timor-Leste ne’ebé sempre suporta Timor-Leste atu adere ba Asean”, dehan Diplomata Filipina ne’e.
Embaixador Filipina ne’e esplika, Durante ne’e Timor-Leste ho Filipina iha relasaun di’ak tanba sira fó vistu ba estudante Timor oan sira liu atus tolu resin ne’ebé mak ba estuda iha Filipina no mós iha aspetu mak Timor-Leste ho Filipina iha Kooperasaun sosiu ekonómia.
“Durante ne’e iha realasaun di’ak nasaun Timor-Leste ho Filipina, ami iha suporta vistu ba estudante Timor-oan sira barak liu atus tolu resin ne’ebé mak ba estuda iha Filipina, no sira balun remata ona sura mai fila fali kontinua sira nia servisu, iha ne’e no mós la’ós iha aspetu ne’e de’it iha mós aspetu sosiu ekonómi no mós Timor-Leste ho Filipina kooperasaun di’ak kona-bá ida ne’e,” katak Embaixador Filipina
Embaixador enkontru ho Prezidente Repúblika, tanba Diplomata ne’e sei husik hela Timor, no mós remata nia kargu iha ne’e hanesan embaixador iha fulan Juñu 22 agora, durante tinan lima (5) nia iha ne’e no sei fila ba Filipina, no mós embaixador ne’ebé mak atu mai fali ne’e agora dadaun seidauk, maibé espera iha tempu badak nia laran sei iha embaixador foun ne’ebé mak sei mai troka. *Jos
