PM Taur: Joven ba Servisu Iha Rai Liur,Tanba TL Laiha Empregu
Naunil Media (Díli), Primeiru Ministru (PM), Taur Matan Ruak apresia sakrifisiu joven sira ne’ebé esforsu ba servisu iha rai li’ur, hodi kontribui ba dezenvolvimentu Timor-Leste, tanba nasaun laiha kapasidade kria empregu ba joven sira.
Lia hirak ne’e hato’o husi Xefe Guvernu ba Jornalista sira hafoin remata enkontru semanal ho Prezidente Repúblika (PR), José Manuel Ramos Horta iha palásiu Prezidensiál Nicolau Lobato Bairru-Pite, kinta (09/06).
“Primeiru ita apresia sakrifisiu dedikasaun ita nia joven sira ne’ebé halo esforsu ba iha rai li’ur hodi kontribui ba dezenvolvimentu ita nia Nasaun nian, hanesan ita bo’ot sira hatene ita nasaun foin nurak foin 20 anos laiha kapasidade para kria empregu ba ita nia joven sira hot”, dehan Xefe Governu.
PM hatutan, Timor-Leste mós buka dalan atu hetan empregu ba sira iha rai li’ur, hanesan parseria ho governu mak Korea do Súl, Austrália no mós haree fatin seluk buka esplora oportunidade seluk hanesan Inglatera, hanesan ho sira nia inisiativa sira ba Irlanda no mós Japaun ho fatin seluk tan.
Taur esplika, governu apresia no halo esforsu para kontinua fó apoiu nafatin ba joven sira, tanba realmente ne’e lá’os fasil husik hela rai ne’ebé nia moris, husik hela nia família sira mas hanoin sira Heroi, no sira fó kontribuisaun ba dezenvolvimentu ne’ebé makaas loos ba nasaun.
“Hanesan ita bo’ot sira hatene iha 2021 ita nia komunidade iha rai liur kontribui sentu vinte um miloens dollar Amérikanu ba ekonómia ita nia rai laran, ajuda ba kresimentu ekonómika ita nian, no mós ajuda kombate kiak iha ita nia populasaun sira nia leet klaru governu kontinua servisu makaas tau matan ba sira”, hakotu Taur. *Jos
