PR Horta Hato’o Gratidaun Ba Parseiru Dezenvolvimentu Sira

Naunil Media (Díli), Prezidente Repúblika (PR) José Manuel Ramos Horta hato’o Gratidaun ba Parseiru dezenvolvimentu, no mós ajensia sira ne’ebé kontinua apoiu durante dékada rua no engajamentu  ba povu.

“Ha’u hakarak hato’o ha’u-nia gratidaun ba parseiru dezenvolvimentu sira hotu, viziñu no la’ós viziñu, bo’ot no ki’ik, Sistema Nasaun Unidas, programa, fundus, ajénsia espesializada, ba kontinua apoia durante dékada rua no engajamentu ho ami-nia povu sira”,  dehan PR Horta liu husi diskursu bainhira partisipa enkontru anual ho Parseiru dezenvolvimentu sira iha Salaun Auditóriu Ministeiriu Finansas Aitarak Laran, sexta, (10/06).

PR hatutan,  Nu’udar País illa, komunidade ki’ik, dala barak sai vulneravel liu, laiha imunidade ba pandemia globál, funu ne’ebé hamosu katastrófe, funu intre-estadu no entre-estadu irrasionál akontese iha fatin barak iha mundu, no rai-maran ka bailoron naruk, inundasaun tanba Inan Natureza nia reasaun ba abuzu durante sékulu ba sékulu ne’ebé komete husi ema.

Horta hateten, Mudansa klimátiku kauza husi atividade umanu, no pandemia globál ne’ebé espalla lalais, hanesan mós ho ema ne’ebé halo viajen iha mundu sempre to’o iha Timor-Leste.

Xefe estadu esplika,  Tinjimentu iha dékada rua ikus kona-ba eradikasaun pobreza globalmente reverte fali ba ema miliaun-ba-miliaun, ne’ebé fila-fali ba pobreza iha mundu tomak, lakon sira-nia rendimentu tanba konfinamentu no interupsaun kadeia abastesimentu ka supply chain, no traballadór labarik no eskravidaun labarik aumenta exponensialmente.

Tanba iha ne’ebé de’it lokaliza iha planeta ida-ne’e, sente impaktu husi katástrofe ne’ebé la’ós ema mak kria, nia hakotu. *Jos