Preokupasaun Sosiedade Bá Seitór Edukasaun La Efetivu
Naunil Media (Díli), Preokupasaun Sosiedade nian bá seitór edukasaun iha Timor-Leste desde uluk mai to’o agora la efetivu.
Edukador Eskola São Paulo VI, Pe. Luis Bonaparte, hateten kada tina-tinan estudante barak mak atu halo teste hodi tama bá iha Ensinu sekundáriu, maibe sira nia indikasaun bá materia báziku menus liu.
“Hau nia observasaun katak, kualidade edukasaun nian tinan bá tinan la efetivu ka ladiak, tanbá ita nia estudante barak mak wainhira ami halo teste atu tama bá iha sekundaria, hatudu indikasaun katak labarik sira neebé mak hatene no domina kona-bá materia baziku nee menus liu”, Pe. Luis Bonaparte, ba jornalista sira, iha ESG São Paulo VI, Segunda (13/06).
Nia hateten, oinsa governu bele tau matan bá iha edukasaun iha baze, maske Governu tau subsídiu bá akademiku sira, laiha tau atensaun bá iha estudante sira iha ensinu báziku sira oinsa atu prepara an ho diak antes tama iha nivel as.
“Materia idatika, livru bá estudante sira iha ensinu báziku too agora laiha, ida nee hatudu katak fó impaktu nafatin bá estudante sira, liuliu bá eskola públiku sira estudante barak mak abandonadu, ho ida nee saida mak pressiza governu kria”, tenik nia.
Nia dehan, “Ita nia preokupasaun dala barak governu halo ita haree buat sira neebé mak la merese tama iha fundu konkretu bá iha estudante sira nia kondisaun, maske ita nia governu tau prioridade liu mak sala, kadeira no meza maibé oinsa atu kria kondisaun diak ida liu husi fornese livru atu nunee bele fasilita diak liu tan oinsa atu aprende kona-bá materia didetika bá estudante sira inklui lingua”.
Relasiona ho preokupasaun nee, sira husu bá Governu atu tau matan mos ba estudante sira iha ensinu báziku, liu husi fó formasaun bá professor sira oinsa atu fasilita estudante sira ho lingua iha ensinu aprendijazem”. hakotu nia. Ana
