SECOMS Lansa Programa Literasia Dijital Dahuluk Eskola Saun Paulo VI
Naunil Media (Díli), Segunda (13/06) ne’e, Sekretáriu Estadu Komunikasaun Sosial (SECOMS-Sigla Português) lansa programa Literasia Dijital dahuluk iha eskola Ensinu Sekundaria São Paulo VI.
Objetivu, liu husi siensibilizasaun Literasia Dijital, Governu bele halo kampania nasional kombate hoax no promove internet saudavel.
Sekretariu Estadu Komunikasaun Sosial, Merício Juvinal dos Reis ‘Akara’, hatete hanesan esforsu ida atu kontinua halo programa edukasaun sívika, liuliu liga ho literasia dijital.
“Programa ida ne’e ita halo, tama-sai eskola, no ohin ita lansa dahuluk iha eskola São Paulo VI. Pressiza tempu uitoan, fulan 6 ka to’o tinan ida mak ita foin halo avaliasaun bá programa ne’e rasik”, Governante ne’e liu husi nia intervensaun iha Eskola São Paulo VI.
Nia hatutan, programa nee sei realiza iha eskola sira hotu, tanbá tuir dadus neebé mak iha maioria estudante no jovem mak uza meius komunikasaun barak.
“Liu husi programa ne’e sira (estudantes) bele hatene kona-bá literasia dijital”, tenik membru governu konstitusionál da’ualu ne’e.
Tuir Merício, “Meius komunikasaun utiliza bá negativu mak barak hanesan hatun malu, promove ka lansa lia falsu (hoax) no seluk tan. SECOMS nia hanoin edukasaun sivika nee mai husi jovem no estudante sira, atu iha koinesimentu ka matenek hodi utiliza media ho diak”.
Iha Fatin hanesan, Konseleiru Konselho Imprensa-Timor-Leste, Otelio Ote, informa KI hanesan instituisaun estadu ida neebé mak independente administrativu no finanseiru iha Timor-Leste, knaar importante defende liberdade imprensa, dezenvolve meius komunikasaun sosial no hasa’e profisionalismu bá jornalista sira.
“Iha termu KI nian mak hanesan Radiu, telivisaun, jornal no online neebé mak rejista ofisialmente liu husi lei neebé mak vigor ona iha konstituisaun RDTL.
“Liberdade imprensa ita haree iha artigu 41 katak sidadaun hotu iha liberdade atu harii meius komunikasaun sosial neebé mak ejiste tuir nia regra no liberdade opiniaun iha artigu 40 katak ema ida-idak iha direitu hodi hato’o nia opiniaun, entaun ida nee mak tama ona iha ita nia plataforma media dijital”. hakotu nia. Ana/MJ5
