Kona-ba Mina Bayu Undan, ANPM Lakohi Taka Realidade TL
Naunil Media (Díli), Prezidente Autoridade Nasionál Petrolio no Minerais (ANPM), Florentino Mateus Soares Ferreira, hateten mina rekursu não renovaveis (la’os produsaun permanente), no tuir prediksaun tékniku mina iha Bayu Undan sei maran iha fulan Outobru tinan 2022 ne’e ba oin.
“Kona-ba Bayu Undan ne’ebé sei maran, loos dunik ! tanba ne’e la’os bee no ida ne’e rekursu não renovaveis ne’ebé Timor-Leste produs desde 2004/2005. Tenke nakloke ona katak, produsaun mina husi tempu ida ba tempu ida sei hotu, sei maran no agora empreza sira ne’ebé halo produsaun iha Bayu Undan, hatete tama fulan Outubru ba oin mina hahu maran”, Prezidente ANPM, Florentino Mateus Soares Ferreira, ba jornalista sira iha Salaun City8 Manleuana, Kinta (16/06).
Tuir Florentino, tenke eduka povu iha teritóriu laran tomak atu hatene lolos situasaun iha Bayu Undan.
“Ami hanesan teknokrata ka ema tekniku, ami laiha intensaun polítika, hakarak esklarese ba publiku hodi eduka atu povu hatene Timor-Leste nia situasaun lolos iha Bayu Undan”, tenik Prezidente ANPM ne’e.
Ikus nia, informa “ANPM esforsu durante tinan rua ikus ne’e mak konsege aumenta tan projetu balun no pela primeira vez Timor-Leste sei halo tan esplorasaun ba bloku 6 iha rai maran no mos bloku 9 iha tasi laran no hamutuk 15 nune’e esperansa katak iha parte balun maran balu bele hetan fali hanesan notisia ne’ebé Timor Resource iha, maske ANPM rasik seidauk simu notifikasaun husi parte empreza Timor Resource rasik”. Ana
