MPM Víctor : Bayu Undang La’ós Maran Maibe Laviavel Atu Produz Nafatin

Naunil Media (Díli), Ministru Petróliu no Mineral (MPM), Víctor da Conceição Soares hateten mina matan Bayu-Undang la’ós maran maibé laviavel ona atu halo produsaun tanba kustu produsaun aas liu fali kustu komersiál.

“Kuandu tama ona ba faze ida ne’ebé labele halo produsaun tanba la ekonómiku ona la’ós maran quer dizer mina mak la viavel ona atu produz nafatin, mina iha nafatin so ke ninia kustu de produsaun ne’e aas liu fali komersiál entaun tenke hapara,” dehan MPM ba Jornalista sira hafoin remata enkontru ho Prezidente Repúblika (PR), José Manuel Ramos Horta iha palásiu Prezidensiál Nicolau Lobato Bairru Pite, Tersa (21/06).

Ministru Petróliu no Mineral ne’e hatutan mas kuandu atu hapara ne’e tama ona faze desmantelamente, mas iha mós projetu seluk ida bolu Carbon Capture and Storage (CCS) ne’ebé agora dadaun Autoridade Nasionál Petroliu no Mineral (ANPM) ho Santos halo MoU no halo ona estudu de viabilidade, estudu ne’ebé klean atu nune’e futuru mai bele kontinua nafatin no bele halo reseitas nafatin ba estadu

“CCS ne’e agora  sei iha estudu nia laran ne’ebé ita seidauk bele hatene guvernu atu investe hira mas sei faze estudu depois faze estudu ne’e kuandu klaru ona ita tenke haree mós enkuadramentu legal lei sira ne’ebé atu regula ida ne’e,” katak Ministru Petróliu no Mineral

Membru guvernu ne’e esplika mina matan Bayu Undang ne’e maran ho sentidu ke hapara nia produsaun ona, labele produz tan, mina iha nafatin mas ninia kuantidade ne’e mak la sufisiente para nia atu produz nafatin se nia produz nafatin nia lakon ou nia rugi entaun sé mak halo produsaun depois selu nafatin trabalhador sira ne’e mas nia rezultadu ida ba faan ne’e la too ida nia gasta ba selu ema ne’e.

Antes ne’e Prezidente Autoridade Nasionál Petróliu no Mineral (ANPM), Florentino Mateus Soares Ferreira hateten mina iha Bayu Undang sei maran tanba ne’e lá’os bee no mina ne’e mina ne’e rekursu naun renovaves ne’ebé Timor-Leste produz desde 2004/2005, no mina ne’e la’ós produsaun permanente tamba ne’e mina no gás ne’ebé iha sei hotu tuir predisaun ne’ebé iha fulan Outubru mina iha Bayu-Undang sei remata.*/Jos