Fundasaun ASSA Atribui Sertifikadu Ba Formandu 111
Naunil Media (Díli), Kinta (23/06) ne’e, Fundasaun ASSA atribui sertifikadu ba formandu nain 111, tanba kompletu ona kursu English For Health Medico Professional durante fulan tolu (3).
Diretor exekutivu Hospital Nasional Guido Valadares (HNGV), Humberto Gama, kongratula ba graduadu sira, remata ona treinamentu.
“Formasaun ne’e foku liu ba iha English Basic no English pre intermedial, ami haree formandu sira nia kapasidade, entaun ami labele fo liu kapasidade ne’ebe a’as liu duke nia nivel sedauk to’o ba profisional”, Humberto Gama, ba jornalista sira HNGV.
Iha fatin hanesan, Diretor executivu Fundasaun ASSA, Bendito Soares, hateten programa ne’e realiza tuir kooperasaun servisu entre fundasaun ASSA ho HNGV.
“Nu’udar Timor oan ita tenki orgullu no investe diak liu tan, tamba ita nia formasaun ba rai laran, hatudu katak Timor oan mos bele”, tenik Diretor Fundasaun ASSA, Bendito Soares.
Nia informa, “Dadaun ne’e ami mos halo kooperasaun ho SEFOPE iha prosesu ba legalizasaun Sentru treinamentu”.
Partisipa iha programa formasaun ne’e, estudante husi Universidade UNTL, UNDIL, ISC no UNITAL. Mj3
