Horta Rekomenda Governu Bandu Importasaun Serveza Alkohol Liu Standar

Naunil Media (Díli), Prezidente Repúblika (PR), José Manuel Ramos Horta hato’o rekomendasaun ba governu atu bandu importasaun serveza ne’ebé alkhool liu nivel estandar saúde públika.

“Ha’u nia Mensajen no rekomendasaun ba governu ba ida ne’e bandu importasaun serveza ne’ebé ho alkohol ke liu nivel estandar saúde públiku, estandar internasionál, purtantu ne’e ajuda proteze mós marka ida ke kria empregu iha Timor-Leste,” dehan Xefe estadu ba Jornalista sira hafoin vizita fabrika serveza Heineken Hera, kinta (23/06).

PR hatutan governu tenke buka proteze investimentu ne’ebé halo iha rai laran, tanba sira mak halo investimentu sira seluk ne’ebé la’ós Heineken hatama serveza ne’e sira la kria empregu iha ne’e, sira nia fabrika iha rai seluk sira fó empregu ba ema seluk iha rai seluk benefisiu ba Timor ne’e zero, husi sira ne’ebé ilegal ne’e no problema boot ba saúde públika alkohol ne’ebé aas demais.

Xefe estadu ne’e mós preokupa serveza lubuk ida ne’ebé tama ilegalmente guvernu la tau matan ba ida ne’e, tanba alkohol aas tebes no mós la selu impostu.

“Ha’u preokupadu kuandu ha’u haree serveza ne’ebé alkhool aas tebe-tebes i nein selu impostu, governu karega impostu Heineken, Heineken selu kontribui liu husi impostu osan lubuk ida tama kofre estadu nian,” katak Xefe estadu

Horta esplika sira seluk ne’ebé importa serveza karun tebe-tebes no alkohol aas tebe-tebes ne’e laselu impostu ou selu impostu hanesan normál ne’e loloos iha rai seluk kuandu alkohol aas tebe-tebes impostu mós tenke aas liu tan iha ne’e kontrariu fali alkohol ne’e aas liu impostu badak.

Aman ba nasaun ne’e hateten vizita Heineken tanba investimentu inaternasional ida iha ne’ebé kria empregu ema atus ba atus mak benefisia nu’udar servisu ne’ebé hetan iha ne’e, mezmu servisu indiretu tanba investimentu ne’e presiza produtu barak balun produtu nasionál ruma hanesan bee, mas bee ne’e mós presiza tratamentu uza mós ai-farina ba halo ida ne’e.

Tuir Prezidente Repúblika ne’e nia haree mós, maske governu autoriza fabrika Heineken, tanba fabrika kria empregu maibé guvernu ladún fó protesaun ba investimentu ida ne’e hanesan la fó protesaun oinsá tanba husik nafatin serveza oioin mai husi li’ur no balun perigozu tebe-tebes ba joven sira, alkohol aas tebe-tebes no balun too kedas 20% alkohol. *Jos