PR Horta Prontu Ho PM Taur Hasai Lei Pensaun Vitalisia
Naunil Media (Díli), Prezidente Repúblika (PR), José Manuel Ramos Horta prontu ho Primeiru Ministru (PM) Taur Matan Ruak atu hasai Lei Pensaun Vitalisia (LPV) nune’e sira ne’ebé hetan ona hetan ba, maibé ba oin mak laiha tan pensaun vitalisia.
“Ha’u prontu, prontu ho Primeiru Ministru tanba Partidu Libertasaun Populár (PLP) Primeiru Ministru promete ne’e dala hira ona, purtantu ha’u prontu para ho bankada sira haree sistema foun ida, la’ós atu hasai sira be hetan tiha ona ne’e, hetan tiha ona ba, desizaun primeiru mak ne’e ba oin laiha tan pensaun vitalisia ba kotuk ne’e ita haree oinsá muda sira ne’ebé hetan tiha ona direitu tanba dalaruma iha lei labele ema ida iha direitu tiha ona depois hasai fali, lei la premite ida ne’e,” dehan Xefe estadu ba Jornalista sira hafoin vizita fabrika serveza Heineken, Hera, Kinta, (23/06).
Tuir Prezidente Repúblika ne’e katak Primeiru Ministru ema ida ne’ebé di’ak no sira ne’ebé iha Parlamentu Nasionál devia hamate tiha pensaun vitalisia no mós la’ós hamate 100% maibé mandatu ida de’it hetan ona pensaun vitalisia mak lae.
“Ha’u hanoin nafatin devia maun boot Taur Matan Ruak ema ida di’ak sira iha Parlamentu hamutuk ho ha’u Prezidente devia haree ida ne’e hamate tiha pensaun vitalisia la’ós hamate 100% maibé purizemplu mandatu ida de’it hetan ona pensaun vitalisia lae ne’e tenke remata, ne’e tenke taka, ne’e tenke kansela,” haktuir Prezidente Repúblika
Aman ba nasaun ne’e esplika sira ne’ebé iha direitu atu hetan pensaun vitalisia ne’e pelumenus mandatu tolu ona, sira 15 anos ona ne’e bele haree pensaun vitalisia mas ho kondisaun tanba polítiku de’it bele hetan pensaun vitalisia tinan 5, tinan 10 funsionáriu tenke servisu tinan 20 resin, tinan 30 resin para hetan pensaun oan ida ne’e lajustru.
PR hateten haree ba oin purizemplu 2023 ba oin laiha tan ona, 2022 ba kotuk haree oinsá re-negosia sira be foin mak tinan 5, sira ne’ebé tinan 10, sira ne’ebé 15 anos sira ne’ebé 20 anos tenke haree ne’e mak hanoin matenek no justu.*Jos
