Guvernu Relata Programa Prioridade 2023 Ba PR Horta

Fahe Tutan

Naunil Media (Díli), VIII Governu konstitusionál relata programa prioridade ne’ebé atu hala’o iha tinan 2023 ba Xefe estadu liuliu programa iha setor sosial no dezenvolvimentu kapitál umanu.

Lia hirak ne’e hato’o husi Ministru Prezidensiá Konsellu Ministru (MPKM), Fidelis Manuel Leite Magalhães ba Jornalista sira hafoin relata programa prioridade 2023 nian ba Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Sesta (24/06).

“Atu bele mai hato’o prioridade sira guvernu nian ba tinan oin, tinan 2023 no mós atu hato’o ou relata kona-ba andamentu lalaok ezekusaun implementasaun programa sira iha setor sosial no setor ne’ebé mak relasiona ho dezenvolvimentu kapitál umanu iha tinan ne’e nia rohan hodi haree prioridade saida mak guvernu hanoin ona ba iha tinan 2023,” dehan MPKM

Fidelis hatutan objetivu prinsipál diskusaun ho Prezidnte Repúblika no mós rona imput sira Preokupasaun sira husi PR para bele iha aliñamentu ne’ebé mak di’ak liu entre Preokupasaun Xefe estadu nian no programa sira ne’ebé mak Guvernu hatur ona ou programa hirak ne’ebé maka guvernu hanoin hela atu halo iha tinan oin mai.

“Hanesan ohin relata ona ba ita boot sira katak ita fahe iha komponente keta-ketak iha programa VIII Governu nian tanba iha setor sira hanesan infrastrutura, setor ekonómia no setor sira boa governasaun no setor hirak ne’e ita la ko’alia ohin, ohin ita fokus liu ba hirak ne’ebé mak relasiona ho kapitál sosial iha setor hirak ne’ebé mak iha area sosial nian,” katak Fidelis

Membru guvernu ne’e hateten buat ne’ebé guvernu ko’alia no relata mak kona-ba implementasaun programa sira hanesan bolsa da mãe jerasaun foun programa sira melloramentu sira iha ezekusaun implementasaun ba programa hanesan alimentasaun eskolar programa sira oinsá hadia liu tan sistema pre-eskolar.

Ministru Prezidensiá Konsellu Ministru ne’e esplika implementasaun ba tinan ida ne’e too wainhira tinan ida ne’e remata no mós hato’o ona ba PR kona-ba intensaun guvernu nian ba tinan oin ne’ebé mós barak hatur ona iha Grande Opsoens ne’ebé mak aprova ona iha Parlamentu Nasionál (PN) no promulgadu ona husi Prezidnte Repúblika.

Depois relata programa prioridade hirak ne’e, Prezidente Repúblika mós preokupa kona-ba des-nutrisaun ho mal nutrisaun entaun haree kona-ba assuntu hirak ne’e no mós haree kona-ba setor saúde enjeral, haree kona-ba saúde labarik sira nian, haree kona-ba saúde inan sira nian, inan isin rua sira no mós haree kona-ba mekanizmu ou medida saida no polítika saida mak guvernu halo adapta para atu bele lori edukasaun ba uma kain sira no atu asesu saúde iha kada uma kain.

Nune’e espera katak iha tempu fulan ida ka semana hirak oin mai sei bele iha sinkronizasaun aliñamentu ne’ebé di’ak liu atu bele iha konversa ne’ebé bele kontinua para nu fin orgaun estadu sira nian servicu hamutuk para bele lori dezenvolvimentu ne’ebé mak di’ak liu, saúde ne’ebé mak di’ak liu ba sidadaun Timor nian tanba ne’e han malu ho filozofia guvernu nian katak ema mak tenke sai sentru ba dezenvolvimentu.*Jos

Leave a Reply

Your email address will not be published.