Diretora Maria : ME Presiza Haforsa Polítika Reintegra Vítima VS Ba Eskola
Naunil Media (Díli), Diretora ezekutiva Forum Komunikasaun ba Feto Timor-Leste (FOKUPERS) Maria Fatima Pereira Guterres hateten Ministeriu Edukasaun (ME) presiza haforsa polítika atu reintegra vitima violensia seksual (VS) ba eskola.
Lia hirak ne’e hato’o husi ezekutiva FOKUPERS ba Jornalista sira hafoin remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Tersa (28/06).
“Hanesan ho ministeriu Edukasaun ita haree oinsá bele haforsa liu tan polítika reintegra vitima sira ba eskola ne’ebé para sira nia eskola tanba kazu violensia seksual no mós kazu insestu tanba iha momentu ne’e susar tebes eskola sira simu fali vitima sira ne’ebé vitima violensia bazeia ba jéneru,” dehan ezekutiva FOKUPERS
Nia dehan durante ne’e FOKUPERS mós fo assistensia no fó advokasia ba vitima sira ne’ebé halo iha nivel ministeriu relevante sira no mós FOKUPERS nafatin kontinua halo servisu ho ministeriu relevante sira hodi haree ba kestaun importante sira.
Ezekutiva ne’e hatutan iha kestaun balun ne’ebé presiza konsidera, wainhira númeru kazu violensia domestika sa’e la dehan katak tanba Informasaun laiha no tanba ema bele hatene ona informasaun, ema hatene ema nia direitu entaun keixa komesa aumenta no númeru kazu mós sa’e tan.
Maria esplika depende mós ba ema nia konsensia tanba dala ruma la dehan de’it kazu violensia domestika no violensia seksual ne’e akontese de’it ema ne’ebé edukasaun kiik bele mós akontese ba ema ne’ebé edukasaun di’ak ba mós ema ne’ebé ekonómia di’ak entaun depende mós ba ema nia konsensia atu responde ba situasaun sira ne’e.
Iha enkontru ne’e Prezidente Repúbliks mós Rekomenda ba organizasaun ne’ebé servicu iha assuntu hapara violensia bazeia ba jéneru tantu iha parte prevensaun, protesaun no mós asesu ba Justisa atu bele nafatin kontinua misaun servicu sira ne’e hotu ho di’ak.
Iha tinan 2020 FOKUPERS konsege rezista kazu hamutuk 305 ital, iha tinan 2021 rezista kazu hamutuk 204 ital no mós tama iha 2022 husi fulan Janeiru too Maiu konsege rezista kazu hamutuk 59, kazu ne’ebé númeru boot husi kazu violensia bazeia ba jéneru mak violensia domestika, kazu abandona, violensia seksual, insestu no mós kazu sira seluk tan.* Jos
