Konseleiru RONETIL: LPV Laiha Vantajen Ba Povu Enjeral

Naunil Media (Díli), Konseleru Rede Observasaun Nasionál Eleisaun Timor-Leste (RONETIL), Laurentino Alves hateten Lei Pensaun Vitalisia (LPV) laiha vantajen ba povu enjeral no vantajen de’it ba líder polítiku.

“Hanesan rede sosiedade sivil no hanesan mós sidadaun ha’u mós konkorda ho ideias husi Juventude balun ne’ebé preokupa sobre lei pensaun vitalisia, klaru lei pensaun vitalisia ne’e nia vantajen laiha ba povu enjeral, vantajen ba ita nia líder Polítiku sira ne’ebé mak asumi kargu hetan fiar atu lidera instituisaun estadu no instituisaun guvernu nian,” dehan Konseleru RONETIL ba Jornalista sira iha nia knaar fatin Farol, Kinta (30/6).

Fundadór RONETIL ne’e hatutan lei pensaun vitalisia nia vantajen ba povu baibain laiha tanba líder sira ne’ebé sei produtivu maske lakontribui ona maibé nafatin hetan pensaun tanba ne’e nia konsidera LPV laiha vantajen ba estadu.

“Entaun iha ne’e ita lojika laiha benefisiu ida ba povu baibain tanba pensaun vitalisia ne’ebé mak ita haree katak ema balun ou líder ne’ebé mak sei produtivu maske kuandu lakontribui ona maibé nafatin hetan fiksasaun husi pensaun vitalisia ne’e ita bele konsidera hanesan laiha vantajen ba estadu,” tenik Fundadór RONETIL

Laurentino mós haree katak komprimisiu no komitmentu polítiku husi Primeiru Ministru atu halakon ou hamenus pensaun vitalisia too agora realidade hatudu PN seidauk iha ajenda fixu ida ne’ebé atu termina katak tempu ona atu hamenus ka atu redus pensaun vitalisia nune’e bele refleta polítika VIII Governu konstitusionál nian ne’ebé mak mai husi komprimisiu polítika husi partidu sira.

Nia dehan too agora seidauk iha serteza ida ba lei ne’e oinsá mak guvernu servicu atu kordena ho Parlamentu Nasionál para fo tempu ba ajenda hodi diskuti kona-ba pensaun vitalisia ne’e rasik, tanba públiku hotu preokupa no públiku hotu haree katak realidade pensaun vitalisia la’ós ona ajenda prisinpal ba PN atu diskuti, tanba haree mandatu besik ona no besik ona tama eleisaun parlamentár, nune’e RONETIL fiar katak ne’e sei la akontese tanba komprimisiu de’it sein iha ajenda klaru.

Antes ne’e Prezidente Repúblika (PR) José Manuel Ramos Horta mós hateten katak prontu ho Primeiru Ministru (PM) Taur Matan Ruak atu hasai Lei Pensaun Vitalisia (LPV) nune’e sira ne’ebé hetan ona hetan ba, maibé ba oin mak laiha tan pensaun vitalisia.

“Ha’u prontu, prontu ho Primeiru Ministru tanba Partidu Libertasaun Populár (PLP) Primeiru Ministru promete ne’e dala hira ona, purtantu ha’u prontu para ho bankada sira haree sistema foun ida, la’ós atu hasai sira be hetan tiha ona ne’e, hetan tiha ona ba, desizaun primeiru mak ne’e ba oin laiha tan pensaun vitalisia ba kotuk ne’e ita haree oinsá muda sira ne’ebé hetan tiha ona direitu tanba dalaruma iha lei labele ema ida iha direitu tiha ona depois hasai fali, lei la premite ida ne’e,” dehan Xefe Estadu

Tuir Prezidente Repúblika katak Primeiru Ministru ema ida ne’ebé di’ak no sira ne’ebé iha Parlamentu Nasionál devia hamate tiha pensaun vitalisia no mós la’ós hamate 100% maibé mandatu ida de’it hetan ona pensaun vitalisia mak lae.*Jos