FEATUREDIkus LiuNewsPolitika

CI Konvida PR Horta Partisipa Iha DDF No Balibó Five

Fahe Tutan

Naunil Media (Díli), Conselho Imprensa (CI) Konvida Xefe estadu atu partisipa iha eventu Dili Dialog Forum (DDF) hodi halo diskursu abertura no mós Komemorasaun Balibó Five ne’ebé sei realiza iha loron 16 Outubru iha Balibó.

Kestaun ne’e hato’o Prezidente Conselho Imprensa Virgilio da Silva Guterres ba jornalista sira hafoin remata hasoru malu ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Sexta, (01/07).

“Ohin CI mai hasoru Prezidente Repúblika ho objetivu prinsipál mak Primeiru atu Konvida Prezidente Repúblika atu partisipa iha eventu rua ne’ebé mak Konsellu Imprensa sei halo iha tinan ida ne’e.Primeiru iha eventu Dili Dialog Forum ne’ebé sei akontese iha dia 25, 26 Agostu tinan ida ne’e hanesan kolega sira hatene katak desde 2017 konsellu imprensa hamutuk ho nia Parseiru sira iha rejiaun Ázia no Pasífiku deklara estabelese Dili Dialog Forum,” dehan Prezidente CI

Prezidente Conselho Imprensa ne’e hatutan iha tinan rua liu ba labele halo tanba pandemia Covid, ho nune’e tinan agora konsellu imprensa planu atu hahu fila fali iha fulan Agostu, tanba ne’e CI Konvida Prezidente Repúblika atu ba hato’o ninia diskursu de abertura iha dia 25.

Virgilio Guterres hateten eventu tuir tan mak Konvida Xefe estadu kona-ba Komemorasaun Balibó Five ne’ebé sei realiza iha 16 Outubru no mós sei halo lansamentu ba loron nasionál liberdade imprensa.

“Eventu segundu ne’ebé ami Konvida Prezidente Repúblika mak ba Komemorasaun Balibó Five iha Balibó dia 16 fulan Outubru i ami ohin hateten ba Prezidente Repúblika ba tinan ida ne’e espesial tanba dia 16 Outubru ne’e hanesan lansamentu ba loron nasionál liberdade imprensa,” tenik Virjilo Guterres

Nia esplika loron 16 fulan Outubru ne’e Parlamentu Nasionál aprova tiha ona liu husi rezolusaun katak 16 Outubru ne’e loron nasionál liberdade imprensa nian, ho objetivu prinsipál sira ne’e mak Conselho Imprensa hato’o ba PR.

Tema ba Dili Dialog Forum tinan ida ne’e mak “Dezafiu média iha sudeste Aziatiku” nune’e  diskusaun tematika sira sei ko’alia kona-ba média ho korupsaun, média iha era dizitalizasaun hanesan diskuti beibeik seguransa dizital.

Tanba Forum ne’e hanesan espasu atu fahe esperiénsia entaun CI Konvida kolega sira husi konsellu imprensa Indonézia, Tailandia, Myanmar no mós media sira husi reziaun Pasífiku ninian atu mai fahe oinsá mak dezafiu saida mak média infrenta iha fatin sira ne’e.

Iha enkontru ne’e mós Prezidente Repúblika hatan katak tempu ne’ebé Conselho Imprensa marka ne’e Prezidente Repúblika laiha previzaun atu bá vizita iha rai seluk tanba iha tempu ne’e Prezidente sei la fó prioridade atu ba rai liur ho nune’e Prezidente Repúblika sei asergura no sei ba eventu rua ne’e.

Nune’e Prezidente Repúblika mós enkoraja Conselho Imprensa ho Parseiru sira seluk atu bele hanoin no diskuti kona-ba oinsá atu partisipasaun média, Jornalista sira husi rai seluk bele masimu liuliu kona-ba Balibó no halo promosaun ne’ebé halo iha Balibó.*Jos

Leave a Reply

Your email address will not be published. Required fields are marked *