OXFAM- Embaixada Nova Zelandia Entrega Uma ba António
Naunil Media (Díli), Segunda (04/07) ne’e, Organizasaun Naun Governamental-ONG OXFAM Internasionál iha Timor-Leste (TL) hamutuk ho embaixada Nova Zelandia mai TL, entrega uma ho medida 9×7 ba António Rosario, tanba konsidera núdar vítima inundasaun iha tinan kotuk (4 Abril 2021).
Seremonia entrega hala’o iha Aldeia Metin, Suku Lahane Oriental, Postu Administrativu Nain Feto, prezente husi embaixador Nova Zelandia mai TL, Philip Hewitt, Diretor OXFAM Internasionál iha TL, Fausto Belo Ximenes no akompaña husi Sekretariu Estadu Protesaun Sivil, Joaquim Gusmão dos Reis Martins.
Ba jornalista sira, Diretor OXFAM Internasionál iha TL, Fausto Belo Ximenes, relata orsamentu ba rehabilitasaun mai husi Governu Nova Zelandia hamutuk 7 mil dolares amerikanu inklui ona material ne’ebe mak uza hodi rehabilita uma.
“Rehabilitasaun uma ne’e la’o durante fulan tolu, kontibuisaun husi komunidade sira bazeia ba dezeñu enjinaria OXFAM”, esplika Diretor OXFAM ne’e.
Iha fatin hanesan embaixador Nova Zelandia mai TL, Philip Hewitt, hateten susar tebes atu hadia situasaun inundasaun iha Timor-Leste, tanba ne’e presija tempu, aprende di’ak liu-tan hodi proteje no asegura familia ba futuru.
“hau hakarak fo obrigado barak ba ekipa tekniku husi OXFAM ho Sekretariu Estadu Protesaun Sivil nia servisu harii no rehabilita uma ne’ebe seguru no reziliente ba komunidade”, agradese diplomata ne’e.
Uma refere sai hanesan uma primeiru husi uma lima ne’ebe sei harii iha fulan Jullu no sei iha tan uma ha’at ho medida, orsamentu no apoiu ne’ebe hanesan. Mj2
