PR Horta Enkoraja CFP Servisu Ho Imparsial no Neutralidade
Naunil Media (Díli), Prezidente Repúblika (PR) José Manuel Ramos Horta Enkoraja Comisaun Funsaun Públika (CFP) atu Servisu ho imparsial no neutralidade nune’e hadook aan husi tentasaun partidaria iha funsaun públika.
Kestaun ne’e hato’o husi Prezidente Komisaun Funsaun Públika Faustino Cardoso Gomes ba Jornalista sira hafoin remata enkontru ho Xefe estadu iha palásiu Prezidensiál Nicolau Lobato Bairru Pite, Tersa (05/07).
“Prezidente Repúblika enkoraja atu komisaun funsaun públika servicu ho di’ak nafatin ho imparsial ho neutralidade hadook aan husi tentasaun partidiriarizasaun funsaun públika i sua excelensia mós enkoraja atu komisaun funsaun públika servicu hamutuk ho entidades tomak inkluindu mós ho ekipa tekniku sira husi Prezidensiá Repúblika hodi haree lisuk ba kestaun funsionalizmu públiku,” dehan Prezidente CFP
Prezidente Funsaun Públika ne’e hatutan PR mós hato’o katak presiza reforma ida oinsá atu hamenus denpedensia ba minarai tanba wainhira funsionalizmu ne’e boot ba beibeik sei tau risku ba sustentabilidade finanseiru estadu.
“Sua excelensia mós hato’o katak ita presiza iha reforma ida atu oinsá mak hamenus denpedensia ba iha minarai tanba wainhira funsionalizmu públiku ne’e boot ba beibeik sei tau ba risku sustentabilidade finanseiru du estadu maibé sua excelensia enkoraja katak presiza atu involvimentu setor privadu nian makaas liu tan hodi nune’e bele sai nu’udar fatin ida para ema buka servicu la nesesariamente tenke ba iha funsaun públika,” katak Prezidente Funsaun Públika
Faustino Cardoso hateten komisaun funsaun públika partilla fahe informasaun no rona mós enkorajamentu sira ne’ebé mak PR hato’o no Preokupasaun balun ne’ebé FP anota atu oinsá ba oin bele iha komunikasaun di’ak ho tekniku sira hodi nune’e sira bele fornese informasaun di’ak
Nia hateten atu informa ba Xefe Estadu kona-ba situasaun funsaun públika Timor-Leste ninian katak funsaun públika ne’e nia boot too ohin loron haree ba númeru pesoais ne’e sai ona rihun tolu-nolu resin-lima tiha ona ne’e kompostu husi funsionáriu permanente rihun rua-nulu resin-hitu resin aumenta tan ho ajente administrasaun públika ne’ebé númeru sa’e ba beibeik no mós aumenta tan ho sira kazuais ho tan sira seluk ne’e besik rihun haat-nolu resin ona se konta ho sira seluk hanesan PNTL, F-FDTL ne’e rihun lima-nulu resin-tolu resin ona ne’ebé bele imazina funsaun públika ne’e boot ba beibeik.*Jos
