Rede Feto TL Rekoñese Kazu Violensia Domestika Kontinua Aumenta

Naunil Media (Díli), Rede Feto Timor-Leste (TL) rekoñese katak maske iha ona lei kontra violensia domestika maibé kazu violensia domestika kontinua aumenta tanba sei iha difikuldade.

Kestaun ne’e hato’o husi Prezidente Rede Feto TL, Zelia Fernandes ba Jornalista sira hafoin ho ekipa remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Kuarta (06/07).

“Ita rekoñese katak iha duni ona lei kontra violensia domestika ne’ebé bele trata liuliu ba iha kazu sira ne’ebé mak liga ba violensia hasoru feto no labarik sira maske nune’e ita haree katak sei difikuldade no númeru kontinua aumenta,” dehan Prezidente Rede Feto TL

Ho nune’e husi Rede Feto Timor-Leste mós aprezenta ba Prezidente Repúblika atu ema hotu iha responsabilidade bele haree oinsá mak halakon no hakotu kazu violensia domestika iha Timor-Leste ne’ebé dadaun ne’e buras.

“Ida ne’e ohin ami mós aprezenta no sai mós hanesan Preokupasaun ida ne’ebé Rede Feto Timor-Leste aprezenta mós ba iha sua excelensia, atu ita hotu-hotu responsabilidade hotu-hotu ninian atu bele haree oinsá mak bele halakon ka hakotu kazu violensia hasoru feto no labarik sira no mós liuliu kazu violasaun seksual no soe bebe ne’ebé mak agora buras dadauk,” katak Zelia Fernandes

Zelia hateten maibé iha parte ida haree katak sosiedade hahú sente katak violensia hasoru feto no labarik ne’e lá’os ona problema uma laran, sira hahú hatene katak ida ne’e hanesan krime ida tanba ne’e mak keixa iha justisa formál mós númeru kontinua sa’e ka boot.

Tanba hanoin katak sosializasaun sira ne’ebé mak halo kontinua la’o nafatin para nune’e bele enkoraja komunidade sira sosiedade tomak atu bele brani hateten sai sa violensia mak sira hasoru iha sira nia uma laran no mós iha sosiedade inklui kauza sira ne’ebé mak sira hasoru.

Nia dehan ho apoiu husi Parseiru dezenvolvimentu sira ne’ebé mak iha rai laran iha inisiativa oi-oin ne’ebé mak la’o para depois bele kontribui oinsá mak hamenus no halakon violensia hasoru feto no labarik sira.

Antes ne’e mós Rede Feto Timor-Leste simu kazu oioin mai husi feto vitima sira no mós labarik sira no transfere ka enkamiña ba FOKUPERS ne’ebé mak haree ka foku liu ba assistensia ba vitima feto no labarik feto sira. Iha enkontru ne’e Prezidente Repúblika mós rona no akompaña di’ak tebes situasaun sira ne’e, nune’e kompromete oinsá mak hamutuk hodi bele hapara ka hakotu violensia hasoru feto no labarik feto sira iha Timor-Leste.*Jos