PM Taur: Husu Vendedor Labele Faan Sasán Iha Estrada Klaran
Naunil Media (Díli), Primeiru Ministru (PM) Taur Matan Ruak husu ba Vendedor ambulante sira labele faan sasán iha estrada klaran tanba kondoutor ruma lanu mak sama ema mate entaun dehan guvernu mak sala.
Lia hirak ne’e hato’o husi Xefe Governu ba jornalista sira hafoin remata enkontru semanal ho Prezidente Repúblika (PR), José Manuel Ramos Horta iha palásiu Prezidensiál Nicolau Lobato, Bairru Pite, kinta (07/07).
“Mas ha’u mós husu ba ita nia Vendedor sira para labele faan fali iha estrada klaran imazina ita boot sira ita nia kondoutor ida nia hemu tua barak iha BAR Kristu Rei ne’ebá lori kareta tesik ba mak sama sira ruma mate ita bo’ot sira dehan nusa oh guvernu lahatene, governu lahatene jere entaun ikus ne’e guvernu mak sala de’it sidadaun nunka sala,” dehan Xefe Guvernu
PM mós hato’o nia pedidu katak ba vendedor sira ne’ebé faan iha fatin sira ne’ebé la interrompe movimentu sidadaun sira nian, enatun labele book karik atu book ou muda tenke esplika nune’e labele agresivu demais
“Ha’u nia pedidu mak ida ne’e enkuantu sira faan iha fatin sira ne’ebé la interrompe movimentu sidadaun sira nian, ba mai labele book sira i karik book tenke negósiu ho sira esplika ba sira, tanba saida mak lori sai tanba saida mak muda mas labele agresivu demais tanba ne’e ha’u lamenta situasaun ida ne’e”, katak PM
Taur mós husu kompreensaun vendedor sira nian atu disiplina uituan, nia fó ezemplu hanesan iha uma mós impoin disiplina ba oan sira, entaun iha sidade mós tenke impoin disiplina, iha fatin balun ke sira bele faan mas fatin balun ke sira labele, tanba karik ema ruma lanu kareta ruma halai makaas ou trafiku makaas sama balun iha estrada laran guvernu mak sala.
Nia dehan, Hanesan ema hotu hatene iha tempu kotuk kuandu Prezidente Autoridade nomeadu kestaun ida Primeiru Ministru, ko’alia mós oinsá mak kontrola sidadaun sira ne’ebé faan sasán.*Jos
