PM Taur: Sei Kaptura Ajensia Ne’ebé Lori Joven Ba Rai Liur
Naunil Média (Díli), Primeiru Ministru PM Taur Matan Ruak hateten kaer hotu ajensia sira ne’ebé laiha autorizasaun husi lei tanba lori joven sira ba husik hela iha fatin-fatin ikus mai ladi’ak ona mak governu tenke responsabiliza.
Lia hirak ne’e hato’o husi Xefe Governu ba jornalista sira hafoin remata enkontru semanal ho Prezidente Repúblika PR José Manuel Ramos Horta iha palásiu Prezidensiál Nicolau Lobato, Bairru Pite, kinta (07/07).
“Tanba ne’e mak ha’u hanoin, ha’u nia pozisaun mak ida ne’e i sira hotu ne’ebé laiha autorizasaun husi lei, para halo ida ne’e ha’u sei haruka kaer hotu ha’u hanesan Ministru Interior, Primeiru Ministru ha’u sei haruka kaer hotu”, dehan Xefe Guvernu
PM Taur mós orientál Ministru Justisa no Polísia Científika Investigasaun Criminal tenke kaptura hotu hanesan krime organizadu, trafiku umanu tanba lori sidadaun ba husik iha fatin-fatin ikus governu mak tenke responsabiliza.
“Ha’u nia orientasaun ba Ministeriu Justisa ho PCIC mak ida ne’ebé sei iha krime organizadu tenke kaptura hotu kaer hotu iha trafiku umanu, tenke kaer hotu tanba sira lori ita nia sidadaun hotu ba husik hela iha fatin-fatin kuandu ladi’ak ona aat ona mak guvernu mak responsabiliza guvernu mak sala kuandu di’ak sira ba ne’ebé-ne’ebé sira kalohan guvernu”, katak PM Taur
Taur mós husu ba ajensia sira tenke para agora no primeiru kumpri lei tanba nu’udar Xefe Guvernu kuandu sai Primeiru Ministru ne’e halo juramentu, jura atu kumpri lei no obriga ema seluk kumpri lei, hanesan hodi bainhira dehan hanesan ne’e la’ós ema aat mak preokupa tenke preokupa ema ne’ebé husik halo aat halo sasán aat husik de’it seluk mak sala.
“Entaun ita iha responsabilidade para bele buka solusaun hodi evita tanba Timor nia bele kiak ita bele kiak ita bele susar maibé ita iha lideransa ida, ita iha guvernu ida, ita iha estadu ne’ebé ha’u hanoin ita hotu-hotu buka halo nusa mak kumpri regras sira ne’e tanba nasaun hotu-hotu ne’ebé ita ba ne’e regras iha”, Tenik Taur
Nia dehan, Sidadaun sira la’o de’it kuandu labele ona no mate governu mak tenke lori fila aat ona, governu mak tenke lori fila ne’e labele sidadaun sira mós tenke hanoin katak iha disiplina sira iha governu ke lidera no sira tenke rona mós no sira tenke kopera mós, klaru ke sira esforsu para halo nusa mak sobrevive tanba ne’e sira mós hanoin katak labele hanoin di’ak de’it hanoin mós aat kuandu aat karik sé mak sira bele konta no sé mak sira bele husu ajuda. *Jos
