Konfrontu Iha Uatulari, PNTL Kaptura Joven Nain 6
Naunil Media (Díli), Polísia Nasional Timor-Leste (PNTL) liu hosi Unidade Espesial Polisia (UEP), reforsa Eskuadra PNTL Uatularai halo kapturasaun ba joven nain 6 iha ne’ebe baku malu entre joven sira iha Aldeia Liasidi, Suku Afaloicai, Postu Administrativu Uatulari, Munisipiu Viqueque.
Tuir Komandante UEP, Superintendente Xefi Polisia, Orlando Gomes, hateten kazu ne’e akontese tanba joven sira hemu tua lanu.
“Problema ne’e mosu tanba vitima ho suspeitu sira hamutuk iha mate uma hodi halo servisu no sira hemu tua to’o lanu todan hodi deskute malu to’o baku malu hodi rezulta vitima nain 2 hetan kanek iha ulun,”katak nia.
Nia afirma,Iha mometu ne’e ita nia membru sira hamutuk ho esquadra Uatulari halo kedas kapturasaun ba suspeitu nain 6 ho inisial AC, AA, AC, LA, PM, no MB”,dehan Orlando Gomes, iha nia knar fatin Kuartel UEP, Bairo-Pite, Kuarta (13/07).
Nia hatutan, Iha prosesu kapturasaun ba suspeitu nain 6 ne’e, UEP-COE lidera hosi Komandante Pelotaun Inspetor Asistente Polisia, Mateus Pinto, hamutuk ho ekipa task force Viqueque nian ne’ebe destaka iha Uatulari.
“Agora suspeitu nain 6 ne’e detein ona iha esquadra PNTL Uatulari hafoin kontinua halo prosesu identifikasaun hodi submete ba investigasaun”,relata nia.
Komandante Unidade Polisia Espesial akresenta, daudaun ne’e membru UEP-COE ne’ebe destaka iha Munisipiu Viqueque hodi reforsa Komandu PNTL Viqueque hodi kontrola rigorozu ba joven sira ne’ebe perturba ordem publika,”hakotu nia. Ana
