UPF Kaptura Timor Oan Nain 5 Hatama Gazolina Ilegal Iha Fronteira
Naunil Media (Batugade), Komandante UPF (Unidade Patrullamentu Fronteira), Superintendente Polisia, Euclides Belo, hateten Polísia Nasional Timor-Leste (PNTL) liu husi Servisu Seksaun Sekreta UPF-PNTL halo vizilansia no kontrolu iha area fronteira, konsege kaptura sidadaun timor oan feto nain-4 ne’ebe halo transaksaun ilegal ba kombusivel iha area Mota-Ain fronteira entre Timor-Leste ho Indonezia.
“iha oras tuku sia kalan ita nia membru Servisu Sekreta halo kapturasaun ba ita nia sidadaun feto nain-4 ne’ebe mak komete krime transaksaun ilegal husi Atambua mai Timor-Leste ba konbustivel tipu Gazolina jerigen 20ltr hamutuk 29 no 5ltr iha 7 sira halo kapturasaun iha area TCL 12 Suku Batugade”,dehan Euclides Belo, Kuarta (13/07).
Nia afirma, sidadaun nain-4 ne’e,UPF halo ona identifikasaun no termu entrega ba iha Esquadra PNTL Batugade hodi halo prosesu kuntinuasaun.
“Iha prosesu identifikasaun ne’e ita identifika sidadaun feto nain 4 ho inisial, CM tinan 50, husi Aldeia Lotan, Suku Leohitu,maibe hela iha Mota-Ain, Suku Batugade, ALP, tinan 18, hosi Aldeia Leohitu, Suku Leohitu no hela iha Mota Ain,”sublinha nia.
Tanba iha mos sidadaun feto nain rua ne’ebe halo kazamentu mista ho timor oan mak YMB, sidadaun Indonezia, tinan 31 hosi Suku Dolaus, Atambua-NTT, no AV sidadaun Indonezia, tinan 31 husi Suku Salore, Atambua-NTT”, relata Euclides Belo.
Euclides akresenta, nia parte entrega ona sidadaun sira hamutuk ho evidensia ba Komandu Esquadra PNTL Batugade hodi kontinua ba prosesu investigasaun no sei prosesa tuir lei ne’ebe vigor iha ita nia nasaun. Ana
