Ekipa Konjunta SIPN-SIM Kaer Sidadaun Nain 4 Hatama Mina Liu Dalan Ilegal
Naunil Media (Maliana), Servisu Informasaun Polisia Nasional (SIPN) destakadu Munisipiu Bobonaro, junta ho SIP Bobonaro, informasaun UEP inklui mos ho F-FDTL-J2 husi Servisu Informasaun Militar (SIM) konsege prende Mina Gazolina masa 13 ho nia kuantidade 455 litrus iha Bairo Nularan, Suku Memo, tanba lalin kombustivel ilegal hosi mota sorin Indonezia mai teritoriu nasional.
Komandante Munisipiu Bobonaro, Superintendente Polisia Antonino Mauluta, hatete ho ekipa konjunta halo kapturasaun ba sidadaun sira ne’e,tanba hatama mina liu dalan ilegal iha fronteira.
Nia afirma,ekipa konjunta kompostu husi SIP Nasional, SIP-BOP, Sub seksaun Informasaun Munisipiu Bobonaro junta ho F-FDTL, asegura sidadaun timor oan nain-4 ne’ebe hatama mina ilegal hamutuk masa 13, ne’ebe hatama hosi suspeitu sira ne’ebe hela iha Aldeia Uluhatin, Suku Memo Kraik ho naran inisial ML tinan 50,TL tinan 32, IdS, tinan 22, no SdJ, tinan 40 ne’ebe hela iha Suku Saburai”,dehan Mauluta, hafoin halo akompanamentu ba sidadaun sira, iha terenu Aldeia Diruaben, Suku Ritabou, Postu Administrativu Maliana, Munisipiu Bobonaro, Segunda (18/07).
Nia hatutan, hafoin halo aprensaun ba objetu hirak ne’e, ekipa konjunta SIP Nasional kontatu kedas mai PNTL Munisipiu Bobonaro hodi intrega evidensia refere ba equipa patrolhamentu inklui asegura evidensia seluk tan iha suspeitu nia uma ne’ebe antes ne’e la konsege deteta,”katak nia.
“Hafoin ita halo identifikasaun ekipa konjunta deteta mina nain iha tuku 03:50 madrugada ne’e,Komandu PNTL Munisipiu Bobonaro orienta membru sira ba iha Suku Memo hodi tula mina nain sira hamutuk nain rua ho inisial TES, feto ida tinan 40 iha Aldeia Uluhatin, Suku Memo, asegura mina Gazoel 35 ltr masa 4 no suspeitu RaG, tinan 24, ekipa asegura mos mina ilegal 35 ltr hamutuk masa 9”,relata nia.
Nia haktuir, oras ne’e daudaun suspeitu hamutuk ho evidensia asegura ona iha Komandu Munisipiu Bobonaro hodi kontinua halo investigasaun, hafoin submete ba Ministeriu Publiku,”hakotu nia. Ana
