Fidelis Abertura Semináriu Nasional Hodi Selebra Aniversáriu CNC Ba Da-V
Naunil Media (Díli), Segunda (18/07) ne’e, Ministru Prezidénsia Konsellu Ministrus (MPKM), Fidelis Manuel Leite Magalhães, abertura semináriu nasional ho tema “Importánsia Husi Justisa Tranzitoriu Ba Dezenvolvimentu Nasionál”, hodi selebra aniversáriu Centro Nacionál Chega, Institutu Públiku (CNC,I.P) ba da-V.
Ministru Prezidénsia Konsellu Ministrus (MPKM), Fidelis Manuel Leite Magalhães, konsidera semináriu ne’e reprezenta objetivu komum Timor-Leste nian, atu bele justifika no hatuur Justisa ba Vitima sira, no mós ba halo loos historia ba hirak ne’ebé mak sein ser iha mekanizmu ida ne’e, no lian laek iha Timor-Leste.
“Ida ne’e mós sai hanesan biban ida atu ita halo fali ezame ida, ba ita nia aan, nune’e karik buat balu ita konkretiza ona, sei iha lakuna ruma karik, oinsa atu hadi’ak liu tan lala’ok instituisaun nian ba tempu hirak oin mai”, Governante ne’e informa liu husi nia breves palavras iha Salaun Konferensia CNC, Antigu Komarka Balide.
Nia subliña, ambitu tinan lima CNC, hafanun fali ema hotu, atu halo hanesan diagnostiku ida ba medida hotu ne’ebé mak Estadu foti ona iha tinan hirak ne’e nia laran, liu-liu hafoin Timor-Leste nia Retaurasaun Independensia iha tinan 2002 to’o agora.
Iha biban hanesan, Diretór Ezekutívu CNC I.p, Hugo Maria Fernandes, hatete, tinan ida ne’e, Centru Chega foti tema ida ne’ebé mak durante tinan lima, Centru Chega ninia ejistensia hakarak introdus, mak ema hotu-hotu bolu nu’udar Justisa Tranzitóriu.
“Ita komesa daudauk, integra no implementa polítika sira ba Sobrevivente sira, husi pagamentu pontual to’o ba iha reunifikasaun. Nune’e, ho Ministériu Saúde mós hanesan ita komesa hetan apoiu atu integra daudauk, kona-ba oinsa mak apoiu Asistensia Saúde ba iha ita nia Sobrevivente sira”, subliña diretór ezekutivu ne’e. LTS
