PR Horta: Agostu Xanana Ba Indonézia Hodi Avansa Akordu Fronteira Rai Maran
Naunil Media (Díli), Prezidente Repúblika (PR) José Ramos Horta hateten fulan Agostu Xefe Negosiadór Kairala Xanana Gusmão ho ekipa sei ba Indonézia hodi avansa ho akordu fronteira terrestre tanba antes ne’e iha ona akordu preliminar.
Kestaun ne’e hato’o husi Xefe Estadu ba jornalista sira iha sala konferensia imprensa VIP Airoportu Internasionál Nicolau Lobato, hafoin ho ekipa remata vizita iha Indonézia, Segunda (25/07).
“Sim iha fulan Agostu maun bo’ot Xanana Xefe negosiasaun fronteira rai maran sei hakat ba Indonézia ha’u lahatene em que dia mas ne’e sei akontese para haree bele avansa ona ho akordu fronteira terrestre, fronteira terrestre uluk antes Covid-19 sira hetan tiha ona akordu preliminar ida mas depois tanba Covid depois mudansa mós iha Indonézia tanba assidente bo’ot akontese ho Ministru Wiranto muda Ministru entaun demora, mas informasaun iha Jakarta mak ne’e iha Agostu maun bo’ot ho ekipa sei ba Jakarta,” dehan Xefe Estadu
Horta hatutan, Prezidente Repúblika Indonézia mós aprezenta ideia ida para halo zona fronteira, ne’ebé seitos privadu Indonézia mak loke fabrika iha ne’ebá tanba ideia sira ne’e di’ak loos.
“Tinan ida liu ba ko’alia iha Suai ha’u hateten ba povu iha ne’ebá ha’u sei halo esforsu para transforma ekonomikamente zona fronteira ne’e husi Suai to’o Mota ain ne’e iha parte rua ida guvernu tenke iha infrastrutura ne’ebé falta iha ne’ebá tanba estrada iha fronteira hanesan Fohorem fatin sira ne’e aat loos tinan 20 nia laran la book i guvernu sei halo”, tenik Horta
Prezidente Repúblika esplika, Parte seluk seitor privadu mak halo ne’e ideia di’ak loos no guvernur NTT ema ida ne’ebé dinamiku tebe-tebes nia hakarak halo zona boot ida iha fronteira Oe-Cussi ho NTT ne’e mós ideia di’ak, mas ideia sira ne’e Primeiru Ministru mak sei haree ho komisaun interminesterial para haree oinsá ba oin.
“Tenke ba oin ita labele ko’alia, ko’alia i guvernur NTT nia ema dinamiku nia lagosta ko’alia depois la halo nia hakarak halo, Prezidente Jokowidodo mós nune’e, ne’e duni ita hotu-hotu tenke hakas aan para buat ne’ebé ita ko’alia, ita iha konsensu iha parte rua ne’e entaun ita halo”, katak Prezidente Repúblika. *Jos
