PR Horta: Jerasaun 1975 Labele Husik Problema 1999 Ba Jerasaun Foun
Naunil Media (Díli), Prezidente Repúblika (PR), José Ramos Horta hateten jerasaun 75 tenke revolve problema ne’ebé akontese iha tinan 1975 to’o 1999, nune’e labele husik problema hirak ne’e ba jerasaun foun.
Kestaun ne’e hato’o husi Xefe Estadu ba jornalista sira iha sala konferensia imprensa VIP Airoportu Internasionál Nicolau Lobato, hafoin ho ekipa remata vizita iha Indonézia, Segunda (25/07).
“Purtantu ha’u fiar ke ambiente nune’e iha tempu badak ita bele taka duni ona problema sira iha kotuk, tanba ha’u nu’udar Prezidente nu’udar elementu ida jerasaun 75 ami labele husik ba jerasaun foun problema ne’ebé hahú iha kotuk, hahú iha 1975 to’o 1999, konsikuensia 1999 ne’e timor oan lubuk ida sei iha Kupang, Atambua iha Jakarta ne’ebá klaru balun ba mai tiha no balun labele mai, tanba desizaun balun ke Nasoens Unidas mak halo i ke ami lideransa momentu ne’e laiha intervensaun ba assuntu ne’e mas tenke rezolve”, dehan Xefe Estadu
Xefe Estadu hatutan, objetivu ne’e mak atu lori sira fila mai, se mak hakarak fila, fila ne’e tanba primeiru sidadaun Timor, nia sempre sidadaun Timor, nia bele hetan nasionalidade oin seluk Indonéziu ka, Amérikanu ka, Portugés kuandu nia hakarak, nia sidadania, nia simu ne’e konstituisaun mak hateten.
Prezidente Repúblika ne’e esplika, Barak iha tiha ona abut iha Indonézia oan lubuk ida iha ne’ebá bei oan tan, servisu iha ne’ebá balun servisu iha governu ema boot iha governu, balun to’o tiha ona General, maijor General.
“Ema di’ak tebe-tebes purtantu ko’alia ho sira hotu-hotu laiha ida ke lakontenti, ha’u ko’alia ho Eurico Guterres ho Joanico barak tan ke ha’u lalembra sira nia naran sira hotu-hotu hakarak de’it di’ak ba sira nia rai”, tenik Prezidente Repúblika.
PR hateten, Wainhira vizita iha Nusa Tengara Timur (NTT), nia mós hasoru malu ho elementu timorense ne’ebé konsekuensia 1999 sei iha ne’ebá reuniaun la’o di’ak loos no hatudu ema hotu nia fuan, nia sentimentu la’ós hanesan 1999 buat hotu-hotu muda, no sira kontenti iha sorumutu ne’e, ne’ebé akompaña husi membru governu balun. *Jos
