PR Laiha Orsamentu Atu Atende Proposta 6.000 Husi Estudante, Komunidade

Naunil Media (Díli), Adjunta Xefe Kaza Civil Henriqueta da Silva hateten Prezidensiá Repúblika (PR) sei haruka proposta hamutuk 6.000 resin ba iha Ministeriu relevante, tanba Prezidensiá laiha orsamentu sufisiente atu atende proposta ne’ebé tama iha Palásiu Prezidente.

Kestaun ne’e hato’o husi Adjunta Xefe Kaza Civil ba jornalista sira liu husi konferensia imprensa ne’ebé hala’o iha Palásiu Prezidensiál Nicolau Lobato Bairru Pite, Tersa, (26/07), relasiona ho estudante no komunidade ne’ebé antes ne’e hatama proposta ba iha Palásiu Prezidensiál.

“Agora dadauk ne’e purvolta 6.000 proposta mak hatama ona mai iha ne’e, maibé ami sei haree iha ne’e ida ne’ebé mak atu kanaliza ba ministeriu solidaridade sosial sei hato’o ba iha ne’ebá se proposta ne’e liga karik ba infrastrutura sei kanaliza ba iha Ministeriu Obras Públikas i seluk karik sei kanaliza mós ba no mós eskolarship sei kanaliza ba iha Ministeiriu Edukasaun, tanba iha ne’e Prezidensiá laiha orsamentu sufisiente atu atende proposta ne’ebé ke mai ho 6.000 i tal”, dehan Adjunta Kaza Civil

Adjunta Kaza Civil ne’e argumenta iha Palásiu Prezidensiál laiha orientasaun polítika ida ba komunidade sira atu hato’o proposta, laiha mós sirkular ruma ne’ebé hasai ofisialmente ba komunidade sira ou ba estudante sira atu mai husu bolsu estudu iha ne’e.

Nune’e mós Assesor Assuntu Polítiku Prezidensiá Repúblika Tomas do Rosario Cabral hateten Presidensia República akompaña atividade Presidênsia nian durante fulan rua nia laran, hare no tetu prezensas komunidades nian iha resinto Presidencial ne’ebé aumenta loron-loron ligadu ba joven estudantes sira feto-mane, inan-aman balun hodi halo aproximasaun atu hatama proposta ba Presidênsia hodi bele hetan tulun ruma ba sira nia necessidades.

“Konsidera katak Presidênsia República nu’udar órgaun estadu númeru um (1) nian, ho nia papel atu garante kumprimentu ba konstituisaun, garante unidade no estabilidade nasionál no promove dezenvolvimentu funsoens instituisaun demokrátikas estadu nian no atu mantein fiel kumprimentu ba knar estadu tomak nian no respeita ba separasaun de poderes,” katak Assesor Assuntu Polítiku Prezidensiá Repúblika

Tanba ne’e Presidênsia Repúblika liu husi konferênsia imprensa ne’e komunika ba lideres no autoridades komunitárias sira, liu-liu Presidente Autoridade Munisípiu, Administradores Posto, Xefe Suku no Xefe aldeia sira hotu katak Presidênsia laiha orsamentu disponivel atu atende ba pedidu hotu-hotu ne’ebé mai husi komunidade sira.

Assesor Assuntu Polítiku Prezidensiá Repúblika ne’e esplika Pedidu barak mak tama ona iha Presidênsia no liu husi diskusaun no avaliasaun téknika no liu husi orientasaun superior Presidente Repúblika atu organiza pedidu sira ne’e hodi re-enkamiña ba instituisaun relevante atu bele fo resposta

Nia dehan perante situasaun excepcionais balun ho karakter urjente no fundamentu humanitario Presidência República sei konsidera hodi avalia situasaun refere ho kbit ne’ebé iha, Presidensia sei konduz levantamentu de dadus no avaliasaun téknika, atu bele hare possibilidade atu apoio ou koordena ho instituisaun kompetentes, sociedade emprezarial ou NGOs ruma karik bele fó assistênsia.

Presidênsia Repúblika mós apresia Kooperasaun no apoiu husi maluk sira hotu liu-liu lideransa komunitaria sira atu bele transmite mensajem povu kona-ba assuntu refere ho loloos. No ikus liu Presidênsia Repúblika hakarak hato’o ba ema hotu nia kolaborasaun no sentidu estadu atu hamutuk garante natatin paz, estabilidade no unidade nasionál.*Jos