KM Aprova Programa Merenda Eskolar
Naunil Media (Díli), Kuarta (27/07) ne’e, liu husi reuniaun Konsellus Ministrus (KM) aprova projetu Dekretu – Lei ne’ebé aprezenta husi Ministru Administrasaun Estatal, Miguel Pereira de Carvalho, no Ministru Edukasaun , Juventude no Desportu, Armindo Maia, hodi aprova Programa Merenda Eskolár núdar subsídiu ida ne’ebé fó iha ámbitu asaun sosial eskolár.
Ministro Presidensia Ministro Konselho, Fidelis Manuek Leite Magalhães, hateten objetivu hodi asegura direitu han loron-loron ho hahan ne’ebé saudavel, ekilibrada no indispensavel ba dezenvolvimentu no insentiva partisipasaun labarik sira iha edukasaun pré-eskolar no iha ensinu báziku, públiku no partikulár, hodi integra ba rede públika ne’ebé situa iha rai-laran, hodi promove ninia prosesu ensinu no aprendizajen”, Ministru, Fidélis, bá jornalista sira, iha palasio Governu.
Nia afirma, iha programa ne’e nia okos sei fornese hahan ba alunu sira estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian, ne’ebé situa iha rai-laran.
“Subsídiu sira ne’ebé fó iha programa ida ne’e maka iha natureza subvensaun públika sira no asume ho forma subsídiu alimentár ne’ebé hato’o espesiál ba sosa hahan ka subsídiu administrativu, ne’ebé ho objetivu atu suporta despeza sira ho enkargu administrativu sira impaktu husi ezekusaun programa ne’e”, katak nia.
Governante dehan, implementadór sira Programa Merenda Eskolár mak estabelesimentu edukasaun pré-eskolár nian.
Tanba ne’e, ensinu báziku públiku no partikulár ne’ebé integra iha rede públika oferta servisu públiku nian ne’ebé nia fatin iha territóriu nasionál no organizasaun komunitária sira, grupu komunitária sira ka hanesan, liu-liu asosiasaun sein personalidade jurídika”, tenik governante ne’e.
Montante subsídiu ne’ebé atribui iha ámbitu Programa Merenda Eskolár fiksa iha U$ 0,42 ba kada loron hanorin no ba kada alunu”,hakotu nia. Ana
