FEATUREDIkus LiuNewsSeguransa

PNTL Bobonaru Check Point Prende Motorizada 21

Fahe Tutan

Naunil Media (Maliana), Komandu PNTL Munisípiu Bobonaro, liu hosi sektor operasaun Tranzitu Rodoviaria hetan apoiu hosi Forsa Rezerva, halo atividade pasa revista iha dalan públiku no konsege halo aprensaun ba motorizada hamutuk 21 ne’ebé viola kódigu Estrada, iha area Rai Foun, Suku Ritabou, Postu-Administrativu Maliana, Munisipiu Bobonaro.

Komandante PNTL Munisípiu Bobonaro, Superintendente Polísia, Antoninho Mauluta, hateten, atividade pasa revista konsege identifika motorista barak maka la iha asesores no dokumentu motor nian.

“Ohin ita halo atividade pasa revista ba transporte publiku sira ne’ebe sirkula via estrada publiku iha area rua maka hanesan Suku Ritabou ita prende motorizada hamutuk 14 no iha Suku Holsa motorizada 7 ho maioria infrator sira ne’e,”dehan Komandante PNTL Munisípiu Bobonaro, Superintendente Polísia, Antoninho Mauluta, Mauluta, Kuarta (27/07).

Nia afirma, viola kodigu estrada tanba tula malu la uza kapasete, espellu laiha, xapa matrikula laiha, dokumentu invalidu, karta kondusaun no dokumentu motor laiha.

“Tanba nee infrator sira ne’e aplika ona koima hodi sira ba selu iha banku BNCTL (Banco Nacional de Comércio de Timor-Leste) maka foti fali sira nia motor ne’ebe PNTL prende. Atividade ne’e, relevante mos ba prevensaun asidente tráfiku no dezenvolve kampaña seguransa rodoviária inklui atu eduka sidadaun no estudante sira hodi respeita leis tranzitu no kódigu estrada nian”, salienta komandante.

Nia akresenta, parte sei foti medidas forte ba infrator sira ne’ebé hetan ona infrasaun husi seksaun Tránzitu Munisípiu Bobonaro nian, maibe kontinua halo movimentu iha estrada públiku,”relata nia.

“Ba infrator sira ne’ebe hetan ona infrasaun hodi kontinua viola kodigu estrada dala rua ba leten ita aplika sansaun selu multa masimu ba sira”, dehan nia.

Nia fó hanoin , Polísia Tránzitu Munisípiu Bobonaro sei regularmente hala’o pasa ravista ba transporte públiku no privadu ne’ebé maka movimenta iha dalan hodi dezenvolve kampaña seguransa rodoviária inklui atu eduka sidadaun sira hodi respeita kódigu estrada,”hakotu nia. Ana

Leave a Reply

Your email address will not be published. Required fields are marked *