FEATUREDIkus LiuNewsPolitika

PM Taur Husu Sidadaun Iha Li’ur Tenke Hatudu Komportamentu Di’ak

Fahe Tutan

Naunil Media (Díli), Primeiru Ministru (PM) Taur Matan Ruak husu ba sidadaun sira ne’ebé iha rai li’ur tenke hatudu komportamentu ne’ebé di’ak tanba Timor-Leste hanesan nasaun ida nune’e komportamentu ema hotu nia tenke sibilizadu.

Kestaun ne’e hato’o husi Xefe Guvernu ba Jornalista sira hafoin remata enkontru semanal ho Prezidente Repúblika (PR) José Ramos Horta iha palásiu Prezidensiál Nicolau Lobato Bairru Pite, Kinta (28/07).

“Ha’u hanesan maun, aman, hanesan Primeiru Ministru ha’u husu ba ha’u nia oan sira ha’u nia alin sira, sidadaun sira ne’e para nia komportamentu ne’e tenke di’ak, ita nasaun ida, entaun ita nia komportamentu ne’e tenke sibilizadu uituan, tanba buat ne’ebé ita halo iha fatin seluk ne’e ita nia naran dois hotu,” dehan Xefe Guvernu

Taur mós triste bainhira Timor oan sira kontinua halo konfrontu iha ema nia rai tanba Timor uluk luta para atu hetan independensia nune’e foti Bandeira iha nasaun sira seluk.

“Ha’u triste loos, Timor oan uluk kuandu ita luta iha fatin-fatin ne’e jagoan, luta ba ukun aan foti Bandeira Timor, agora ne’e balun iha malae nia rai atu hatun fali ita nia Bandeira ne’e ladún di’ak fo imajen ida ke ita Timor ne’e so hatene mak halo problema ne’e labele,” katak Taur

PM esplika baibain ema dehan labarik sira ba halimar estraga ema nia jardim halo aat ema nia buat ruma, ema trata inan aman o nia inan aman la hanorin dalaruma inan aman lasala buat ida entaun ida ne’e mós hanesan sira halo iha ne’ebá iha ne’e mak lori todan ema dehan haree Timor hanesan ne’e no hanesan ne’ebá pelu kontrariu ema ida ema rua nia hahalok.

Xefe Guvernu ne’e mós hakarak Timor oan repodia, lagosta, lakohi no husu para sira reve sira nia komportamentu hatudu buat ne’ebé di’ak para halo morin la’ós de’it joven sira nia naran sira nia familia pois halo mós Nasaun Orgullu tanba sira lori Bandeira Timor reprezenta iha fatin-fatin.*Jos

Leave a Reply

Your email address will not be published. Required fields are marked *