PPN Aniceto: Agostu PN-TL Sei Vizita DPR Indonézia
Naunil Media (Díli), Prezidente Parlamentu Nasionál (PPN), Aniceto Longuinhos Guterres Lopes, hateten fulan Agostu tinan ne’e Parlamentu Nasionál Timor-Leste (PN-TL) sei halo vizita ba DPR Indonézia tanba antes ne’e parte rua konkorda malu ona.
Kestaun ne’e hato’o husi Prezidente Parlamentu Nasionál ba Jornalista sira hafoin remata enkontru ho Prezidente Repúblika (PR) José Ramos Horta iha palásiu Prezidensiál Nicolau Lobato Bairru Pite, Kinta, (28/07).
“Ha’u mós informa ba Prezidente Repúblika atu a nivel Parlamentu ho DPR Indonézia ami konkorda malu tiha desde tinan uluk atu vizita ba malu i tinan ne’e Parlamentu Nasionál Timor-Leste atu bá vizita uluk DPR Indonézia iha fulan Agostu 2022 ne’e iha dia 22 ho 23 atu bá vizita DPR Indonézia,” dehan Prezidente PN
PPN hatutan nune’e informa hela ba Prezidente Repúblika hanesan mós koordenasaun para labele aumezmu tempu iha momentu ida hanesan Prezidente Repúblika sai depois Prezidente Parlamentu mós iha hela li’ur karik en que labele akontese hanesan ne’e.
“Ohin Prezidente Repúblika fo hanoin ha’u bainhira bá vizita DPR Indonézia karik, tanba DPR Indonézia seidauk trata dokumentu fraternidade umana ne’e hanesan Parlamentu Nasionál trata ne’e adopta hanesan dokumentu nasionál i karik DPR Indonézia mós halo hanesan Parlamentu Nasionál halo, trata fraternidade umana ne’e sai dokumentu referensia nasionál Indonézia ninian,” tenik PPN
Iha enkontru entre líder orgaun rua ne’e mós hanesan troka informasaun kona-ba situasaun estadu nian, sim tamben husi Prezidente Repúblika hato’o informasaun kona-ba vizita ba iha Indonézia ke ema hotu akompaña Prezidente Repúblika ba Indonézia lao di’ak no ema hotu akompaña katak susesu.
Aniceto hateten embora rona liafuan uituan husi deputadu sira no nu’udar Prezidente Parlamentu Nasionál tenke mai husu deskulpa ba Prezidente Repúblika lori deputadu sira nia naran, hanesan maneira ruma ne’ebé ema akompaña iha média, loloos ladún di’ak, enkuantu vizita enjeral hotu-hotu di’ak maibé ho espresaun hirak ne’e ho maneira sira ne’e parese halo ema sente hotu.*Jos
