Populasaun Kontinua Husu Ajuda Iha Palásiu Prezidensiál

Naunil Media (Díli), Populasaun sira kontinua husu ajuda ba nai ulun sira iha palásiu Prezidensiál liu husi proposta ne’ebé antes ne’e sira hatama ona nune’e sira bele halo negósiu tuir planu ne’ebé sira iha.

“Ida ne’e mak ami husu ba Avo nai ulun sira nia ajuda, ami ho ami nia maluk sira ne’ebé mak lahetan para ami bele hetan kartaun recivu, aban bain rua atu hetan ou lahetan yang penting recivu ne’e ami kaer katak husi palásiu Prezidensiál,” dehan komunidade Isabela Tavares Araújo ba Jornalista sira iha resintu palásiu Prezidensiál Nicolau Lobato Bairru Pite, Sesta (29/07).

Komunidade ne’e hatutan sira nia prosposta husu ajuda tanba atu halo negósiu, no proposta ne’ebé sira hatama ne’e husu tuir kabiib ne’ebé iha maibé estadu kuandu fo hira simu de’it.

“Ami nia proposta husu ajuda mak ami atu halo negósiu hanesan balun faan Ai, balun iha usaha halo dosi, tunu sate, faan modo proposta ne’e ami hatama individu ou ida-idak ninian, ami husu tuir kbiit ne’ebé ita iha, orsamentu ne’ebé ami mensiona iha proposta nia montante kuaze $ 500,00 karik estadu fo hira mai mós ami agradese no ami simu de’it,”katak komunidade

Nia mós husu tenke hetan hanesan hotu se sira lahetan hotu-hotu labele hetan ajuda ne’e ou hetan ajuda ne’e, sira nia proposta ne’e entrega iha Kuarta loron 20 sira maluk balun ikus ne’e sira mai hetan tiha ona, no too agora balun seidauk hetan recivu.

Iha fatin hanesan Assesor Apoiu Sosiedade Sivil Quintiliano Moniz Carbalho husu komprensaun ba populasaun sira ne’ebé atu simu recivu tanba proposta kuaze 6.000 nune’e too lokraik bele kontinua fahe recivu sira ne’e.

“Ami komprende situasaun ne’ebé mak ita hasoru, ha’u komprende balun ohin simu resivu balun seidauk simu recivu, kalma buat hotu-hotu ita atende ema ne’e 6.000 orang ne’ebé labele hirus malu labele hakarak malu ha’u komprende ita boot sira mai atu simu recivu, entaun sira fahe ona balun, balun seidauk fahe señór sira loraik tuku 3:00 se mak seidauk simu recivu karik ita boot sira mai ita forma didiak foti ita boot sira nia recivu,” tenik Assesor Apoiu Sosiedade Sivil

Assesor ne’e mós husu ba inan aman sira kona-ba prosposta ne’ebé hatama atu simu recivu, mas recivu ne’e lá’os ker dizer katak recivu ne’e fo garantia ba inan aman sira katak proposta ne’e atu hetan tulun ruma.

“Imi nia proposta ne’e iha ne’ebá inan aman sira imi hakerek kedas imi nia númeru kontaktu, ami entrega recivu ne’e tanba imi hatama númeru rejistu ne’e mak tenke halo recivu la’ós despaxu katak imi hetan osan ona lae,” katak Assesor

Tanba proposta sira ne’ebé iha ekipa palásiu Prezidensiál nia liman no proposta nain kaer ona recivu ne’e, sei kria ekipa indepeden ida iha laran halo verifikasaun no verifika hotu populasaun sira nia proposta depois ekipa sei kontaktu no sei tun direitamente ba halo survei fatin karik iha orsamentu ruma bele apoiu no se boot liu sei re-enkamiña ba Ministeriu sira. *Jos